प्रचण्डपुत्रीले भनिन्,- रुखमा परेको मत माओवादीको हुनुपर्छ भनेकी छैन
चितवन, नेपाली कांग्रेस र माओवादीको तालमेलमा भरतपुर महानगरपालिकाको संयुक्त उम्मेदवार रहेकी प्रधानमन्त्री प्रचण्डकी पुत्री रेणु दाहालले आफूले कांग्रेसको रुख चिह्नमा परेको आफ्नो पक्षमा गणना हुनुपर्छ भनेर नभनेको बताएकी छन् ।
केही सञ्चारमाध्यमहरुमा उनले मेयर पदका लागि कांग्रेसको रुख चिह्नमा परेको मद पनि रेणुले आफ्नो पक्षमा गणना हुनुपर्ने माग गरेको भन्दै समाचार आएपछि उनले यस्तो बताएकी हुन् ।
‘कांग्रेसको चुनाव चिह्नमा परेको मत माओवादीको हुनुपर्छ भनेर मैले भनेकी छैन,’ उनले भनिन्, ‘मेयर र उपमेयरका लागि माओवादीले तालमेल गरेकाले त्यस्तो अवस्थामा कसरी मतगणना गर्ने भन्ने विषयमा साथीहरुले कुरा उठाउनुभएको हो । तर, त्यसमा कुनै अडान लिइएको छैन ।’
सर्वदलीय बैठकमा आफूले भन्दै नभनेको बिषयलाई लिएर मिडिया र सामाजिक सञ्जालमा नकरात्मक टिप्पणी भइरहेको भन्दै दाहालले आपत्तिसमेत जनाइन् । एमाले समर्थित मिडियाहरुले आफनाविरुद्ध नकरात्मक प्रचारबाजी गरेको उनको भनाइ छ ।
केही वडामा मतदाताको संख्याभन्दा बढी मत परेको भन्ने देखिएपछि मतगणना सुरु गर्न ढिलाई भएको बताइन् ।
