भारतीय पक्षले ५०० मिटर नेपाली भूमि मिचेर लगाए ३० किलोमिटर लामो बाँध
सप्तरी, जेठ २१ । सप्तरीको छिन्नमस्ता गाउँपालिकामा भारतीय पक्षले एकपक्षीय रूपमा लगाएको बाँधका कारण सप्तरीका दर्जनभन्दा बढी गाउँ डुबानमा पर्ने भएका छन् । भारतले झण्डै एक अर्ब ५६ करोड रुपैयाँको लागतमा भारतको निर्मलीदेखि सप्तरीको तिलाठ्ठी सम्म ३० किलोमिटर लामो बाँध बनाउदै छन् । बाँधको काम अन्तिम चरणमा पुग्न लाग्दासम्म सप्तरी प्रशासनले थाहा पाउन नसक्नु आफैमा आश्चर्यजनक र रहस्यमय बनेको छ ।
नेपाल–भारतको जंगे पिलर नम्बर २३६ भन्दा ५०० मिटर नेपाली भुभाग हुँदै निर्माण गरिएको २५ फिट अग्लो र २० फिट चौडा बाँधका कारण हजारौं बिगाहा नेपाली भूमि डुबानमा पर्ने निश्चित रहेको स्थानीय बासिन्दा जय प्रकाश यादवले बताउनुभयो ।
गत वर्ष सप्तरीको तिलाठ्ठीमा भारतीयले पानीको बहाब नै थुन्ने गरी बाँध बनाउन थाल्दा सप्तरीको तिलाठ्ठीबासीले अवरोध गरेपछि रोकेका थिए ।
बाँध निर्माण बारे सप्तरीका प्रमुख जिल्ला अधिकारी कृष्ण बहादुर कटुवालले बाँध निर्माण बारे आफूलाई थाहा नभएको र आजै अनुगमन गर्ने बताउनुभयो । सिमाना सुरक्षाको जिम्मेवारी पाएको सशस्त्र प्रहरी सीमा सुरक्षा बल सप्तरीका एसपी रामाधार यादव यसबारेमा केही बोल्न चाहनुभएन । – ऊज्यालो ।
