मतदातालाई पैसा बाँड्दैगर्दा कांग्रेस उम्मेदवार समातिए, प्रहरी मुचुल्का बन्न सकेन
झापा, १० असार । मतदातालाई पैसा बाँड्दै गरेको ठाउँमा कांग्रेस उम्मेदवार फेला परेपछि स्थानीयले समातिएका छन् ।
झापाको कचनकवल गाउँपालिका वडा नम्बर ३ स्थित खिराचन माझीको घरमा बुधवार राती पौसा बाँड्दै गर्दा कांग्रेस वडा अध्यक्षका उम्मेदवार पुष्पलाल राजबंशी र स्थानीय शिक्षक भूमिलाल राजबंशीलाई गाउँलेहरुले पक्रेका हुन् ।
घटना विवरण अनुसार कांग्रेस उम्मेदवार राजबंशी शिक्षक भूमिलाललाई लिएर राती स्थानीय मतदाता खिराचन माझीको घरमा गएका थिए । सुत्ने तरखरमा रहेका खिराचनलाई बोलाएर उनीहरुले ढोका खोल्न लगाएका थिए। खिराचनसँगै हिना माझीले पनि उम्मेदवारले बोलाएपछि ढोका खोलेर भेटे । उनीहरुलाई कांग्रेस उम्मेदवार राजबंशीले अहिले चुनाव प्रचारका लागि पर्चा दिन मात्रै आएको र चुनावपछि बसेर कुरा गर्नेगरी आउने भन्दै पर्चा दिए ।
गाउँपालिका अध्यक्ष, उपाध्यक्ष र वडाअध्यक्ष सदस्यहरुको तस्बिरसहितको पर्चाका बीचमा उनीहरुले पाँच–पाँच सय रुपैयाँका नोट राखिएको थियो । माझीले पर्चासँग नोट पनि राखेको थाहा पाएपछि आफूलाई पैसामा किन्न नखोज्न चेतावनी दिए । कांग्रेस उम्मेदवार राजबंशीले पछि फेरि कुरा गर्नेगरी आउने भन्दै पर्चा र नगद अहिले यहीँ छोडेर जाने वताएपछि माझीको परिवारले आफूहरुलाई पैसामा किनेर अपमान गर्न खोजेको भन्दै होहल्ला गरे ।
उनीहरुको होहल्लाले गाउँले जम्मा भए । गाउँलेले तत्काल प्रहरीलाई खवर गरे । प्रहरी घटनास्थलमा आइनपुग्दै कांग्रेस उम्मेदवार र शिक्षक राजबंशी पैसा र पर्चा छोडेर भागे । गाउँलेहरुले पैसा बाँड्न आएका उम्मेदवारलाई पक्राउ गरी सर्जमिन मुचुल्का तयार गर्न माग गरेका थिए । तर, उम्मेदवार राजबंशी भागेकाले प्रहरीले मुचुल्का उठाउन सकेन ।
