तरुण दल संयोजक नविन पुन माथि माओवादी केन्द्रका कार्यकर्ताद्वारा आक्रमण, गम्भीर घाइते
नेपाली कांग्रेसको भातृसंगठन तरुण दलका पुथाउत्तरगंगा संयोजक नविन पुनमाथि आक्रमण भएको छ । पुनलाई माओवादी केन्द्रका कार्यकर्ताहरुले आक्रमण गरी गम्भीर घाइते बनाएको रुकुम कांग्रेसले आरोप लगाएको छ । आक्रमणबाट गम्भीर घाइते बनेका पुनको कास्की पोखरामा उपचार हुन नसकेपछि थप उपचारको लागि काठमाडौ लगिएको नेपाली कांग्रेस रुकुमका सभापति प्रेम प्रकाश ओलीले जानकारी दिनुभयो ।
गएको असार १८ गते राति ३० जना भन्दा बढिको समूहमा आएका माओवादी केन्द्रका कार्यकर्ताले आक्रमण गरी घाइते बनाएको सभापति ओलीले आरोप लगाउनुभयो । घटना पश्चात घाइतेलाई वेपत्ता बनाइएको र हप्ता दिनपछि मात्रै आफूलाई थाहा भएपछि उपचारको लागि पोखरा लगे पनि त्यहाँ उपचार सम्भव नभएकाले आइतबार काठमाडौ ल्याइएको ओलीले बताउनुभयो ।
घाइते पुनको टाउको र अनुहारमा गम्भीर चोट लागेको छ । नेपाली कांग्रेस रुकुमले पुनमाथि चुनाव अघिदेखि नै माओवादीले आक्रमणको योजना बनाएको सूचना प्राप्त भएको आरोप लगाउनुभयो । नेपाली कांग्रेस रुकुमले विज्ञप्ती जारी गदै घटनाका दोषीहरुलाई कारबाही माग गदै जंगली शैली सुधार गर्न माओवादीलाई चेतावनी पनि दिएको छ ।
सभापति ओलीद्वारा हस्ताक्षरीत विज्ञप्तीमा भनिएको छ ‘पहिलादेखि नै नविनलाई ज्यान मार्नको लागि माओवादी कार्यकर्ताहरु योजना बनाइरहेका थिए’ यो घटनाले माओवादीको अझै जंगली स्वरुप बाँकी नै रहेको देखाएको छ ।’ यो घटनालाई पार्टीगत रुपमा नजोड्न माओवादी रुकुमका एक नेताले बताउनुभयो ।
– उज्यालो अनलाइनबाट
