पुलमा भ्वाङ परेपछि एकैपटक चारवटा गाडी दुर्घटना
सप्तरी । सप्तरीको सुरुङ्गा नगरपालिका ५ कुसहास्थित विर्धना पुलमा भ्वाङ परेपछि शुक्रबार अपरान्ह एकैपटक चारवटा गाडी दुर्घटनामा परेका छन्।
भ्वाङका कारण गुड्दा गुड्दैको मालबहाक ट्रक एक्कासी पुलमा ठोक्किएपछि ट्रकको पछाडी रहेका अन्य तीन सवारी साधन पनि दुर्घटनामा परे। पूर्वबाट पश्चिमतिर आउँदै गरेको ना.५ ख २७७२ नं. को ट्रक पुलको पूर्वी भागमा आइपुगे लगत्तै पुलको दक्षिणपट्टिबाट ५० से.मी. ब्यास भएको भ्वाङ्मा परेपछि एक्कासी पुलमा ठोक्किएको थियो।ट्रकको अगाडीको सिसा काम नलाग्ने गरी फुटेको छ।
त्यसक्रममा सबैभन्दा पछाडि रहेको धनुषाको जनकपुर ११ स्थित शहीद स्मृति प्रतिष्ठानको ज.१च ७२२ नम्बरको एम्बुलेन्सका सहचालक धनुषा बटेश्वर गाउँपालिका ६ का करिब २५ वर्षीय सुदिपकुमार महतो निधारमा चोट लागेको छ। घाइते महतोको लहानस्थित सप्तऋषि अस्पतालमा उपचार भईरहेको इलाका प्रहरी कार्यालय कडरबोनाले जनाएको छ।
सबैभन्दा अगाडि रहेको ट्रक एक्कासी रोक्किंदा त्यसको पछि रहेको ना.६ ख ९६२२ नं. को कन्टेनर ट्रक, त्यसपछि रहेको ना.६ ख ७१६२ नम्बरको कन्टेनर ट्रक र सबैभन्दापछि रहेको एम्बुलेन्स ठोक्किएका हुन्। पुलनजिकै चार वटा सवारी साधन ठोक्किएपछि करिब एक घण्टा सवारी आवागमन प्रभावित भएको थियो।
इलाका प्रहरी कार्यालय कडरबोना र सशस्त्र प्रहरी बल सुरक्षा बेस क्याम्पबाट आएका नेपाल प्रहरी र सशस्त्र प्रहरीले करिब एक घण्टापछि अबरुद्ध सडक खुलाएका छन्। ठोक्किएका सावरी साधन कडरबोना प्रहरीले आफ्नो नियन्त्रणमा लिएको छ।
