स्कुलबाटै अपहरण परेका बालक यसरी फेला परे
काठमाण्डौ । अपहरणमा परेका पकनाजोलस्थित सरस्वती माविमा युकेजीमा अध्ययनरत पाँच वर्षीय बालक विशाल चौधरीलाई प्रहरीले आज सकुशल उद्धार गरेको छ ।
ती बालकलाई महानगरीय अपराध अनुसन्धान महाशाखा र जिल्ला प्रहरी कार्यालयको टोलीले आज बिहान काँडाघारीबाट उद्धार गरेको हो । महाशाखाका प्रहरी उपरीक्षक प्रकाशजंग कार्कीले जानकारी दिनुभयो ।
उहाँले उद्धारस्थलबाट टोली आइसकेपछि विस्तृत विवरण सार्वजनिक गरिने बताउनुभयो । प्रहरीले घटनाको अनुसन्धानका क्रममा एकजनालाई नियन्त्रणमा लिएको छ ।
महाशाखाका प्रमुख एसएसपी दिनेश अमात्यका अनुसार बिहान ४ बजे काँडाघारी क्षेत्रमा बालक सडकमा छाडिएका थिए । ‘एक जना बुढी महिलाले बालकलाई सडकमा फेला पारेपछि प्रहरीलाई खबर गरिन् । त्यसपछि अपराध महाशाखाबाट खटिएको टोलीले बालकको उद्धार गरेको हो,’ अमात्यले भने ।
विद्यालयको सिसीटिभी फुटेज अध्ययन गर्दा बालकका बाबु विद्यालय पुग्न ५ मिनेटअघि एउटा मोटरसाइकलमा राखेर बालकलाई कसैले लगेको देखिएको थियो ।
परिवारले आफ्नो पसलमा काम गर्ने कामदारमाथि अपहरणको आशंका गरेका छन् । तलब नदिएको निहुँमा कामदारसँग त्यसअघि भनाभन भएको परिवारले बताएको छ ।
यही साउन १२ गते सो विद्यालयबाट घर फर्कने समयमा ती विद्यार्थी अपहरणमा परेका थिए ।
