विपत्तिमा परेकाहरुको उद्दारको लागि नेपाली सेनाले गर्यो यस्तो प्रशंसनीय काम – हेर्नुहोस् भिडियो सहित
काठमाडौं, साउन ३० । नेपाली सेनाले अविरल वर्षाका कारण देशका विभिन्न भागमा विपत्तिमा परेकामध्ये हालसम्म पाँच हजार ६०० सर्वसाधारणको उद्धार गरेको छ ।
सैनिक जनसम्पर्क निर्देशनालयकाअनुसार हालसम्म चार हजार ५०० जनाको स्थलगत तथा एक हजार १०० जनाको हवाई उद्धार गरिएको छ ।
बाढी तथा पहिरो प्रभावित क्षेत्रमा खोज, उद्धार तथा राहतका लागि स्थानीय प्रशासनसँगको समन्वय तथा सहकार्यमा आवश्यक उद्धार सामग्रीसहित नेपाली सेनाको उद्धार टोलीसहित पाँच हेलिकोप्टर निरन्तररुपमा परिचालन भइरहेको सैनिक मुख्यालयले जनाएको छ ।
बाढीपहिरो र डुबान क्षेत्रमा हाल नेपाली सेनाबाट करिब सात हजार ५०० सैनिक परिचालित रहेको जनाइएको छ ।
मोरङ जिल्लामा तैनाथ युनिटबाट खटिएको उद्धार टोलीले गछिया खोलाले कटान गरेको स्थानमा १३ ग्याबिन जालीमा ढुंगा भरी बाढी रोकथाम गरेको सेनाले जनाएको छ ।
रौतहटको गौर इलाकामा डुबानमा परेकालाई हेलिकोप्टरद्वारा एक हजार २०० केजी खाद्य सामग्री, औषधि तथा पानी पुर्याइ वितरण गरिएको जनाइएको छ ।
त्यस्तै, बाँकेका फत्तेपुर र गंगापुर इलाकामा नेपाली सेनाकै हेलिकोप्टरबाट चाउचाउ १०६ र बिस्कुट २६ बाकस, ड्राइ फुड १०० पोका, जीवनजल १५ बाकस, चिनी १२ र चिउरा ७५ बोरा, सिटामोल र मेट्राजोल पाँच/पाँच हजारओटा र पिउनेपानी एक हजार २०० बोतल वितरणका लागि पुर्याइएको निर्देशनालयले जनाएको छ । रासस
भिडियो हेर्नुहोस्
