सीमा बचाउ अभियानकर्ता भारतीय प्रहरीको नियन्त्रणमा !
सप्तरी, असोज १५ । सप्तरीमा सीमा बचाउ अभियानकर्ता देवनारायण यादवलाई भारतीय प्रहरीले पक्राउ गरेको छ।
शनिवार भारतीय बजारमा लागेको दशेरा मेला हेर्न गएका यादव सहित तीनजनालाई भारतीय प्रहरीले नियन्त्रणमा लिएको थियो । यादव र अर्का एकजनालाई शनिवार नै रिहा गरे पनि उनका छोरा प्रहरी नियन्त्रणमा छन्।
सप्तरी प्रहरी प्रमुख एसपी मुकेशकुमार सिंहका अनुसार आइतबार छोराको रिहाईका लागि सीमापार गएका यादवलाई उताको प्रहरीले नियन्त्रणमा लिएको छ।
एसपी सिंहले भने, ‘मैलेपनि केही समयअघि घटनाका बिषयमा जानकारी पाएको छु । के भएको हो बुझ्ने प्रयास भइरहेको छ ।’
सप्तरीको तिलाठी सीमाको दशगजा र भारतको बिहार राज्यको सुपौलको कुनौलीको दशगजा क्षेत्रमा पर्ने खाडो नदीमा भारतीय पक्षले एकतर्फी रुपले बाँध बनाएको विरोधमा उनी उत्रिएका थिए।
नेपाली भूमि रक्षाका लागि चार घण्टासम्म लड्दा साह घाइते भएका थिए। यादव सप्तरी तिलाठीका बासिन्दा हुन । भारतीय सीमा सुरक्षा बलसँग नेपाली भूभागका लागि निरन्तर लड्दै आएका यादव भारतीय पक्षको निशानामा थिए ।
