पोखरामा १३५४२ मतले जि’त्ने नेकपाको दा’बी
पोखरा । कास्की २ बाट रिङआउट भइसकेका नेकपा डबलका उपाध्यक्ष बामदेव गौतम फेरि चर्चामा आएका छन् । यसअघि उमेदवार बन्ने कि नबन्ने कार्यकर्ताहरुको बहसले बामदेव कास्कीमा नेकपा भित्र चर्चामा आए ।
उनी नै आगामी उमेदवार हुनेसमेतका ठोकुवा समेत भए । तत्कालीन मालेको नेतृत्वकर्ता र स्व. रवीन्द्र अधिकारी पनि बामदेव निकटकै मालेको विद्यार्थी नेताबाट राजनीतिमा उदाएका थिए । उनै रविन्द्रको निधनपछि रिक्त कास्की २ को प्रतिनिधीसभा उपनिर्वाचनमा उम्मेदवार बन्ने चर्चाले बामदेव सतहमा आए ।
गौतम आफैँले पछि उमेदवार नबन्ने स्पष्टिकरण दिए । उनी उमेदवार नबन्ने प्रष्टिकरण दिएपछि नेकपाले रवीन्द्रपत्नी विद्या भट्टराईलाई उमेदवार बनाएको छ ।
त्यसपछि, शान्त भएको बामदेवको चर्चा मंगलबार फेरि दोहोरिएको छ । मंगलबार बामदेवको नाम कार्यकर्ताले नभई स्वयम् नेकपा कास्कीका अध्यक्ष कृष्ण थापाले लिएका हुन् । चुनावी तयारीको मुख्य एजेण्डासहित नेकपा कास्कीको सोमबार जिल्ला कमिटीको पूर्ण बैठक बसेको थियो । उक्त बैठकमा उम्मेदवार विद्या पनि सँगै थिइन् ।
सोही बैठकको निर्णय सुनाउन नेकपाले मंगलबार दिउँसो पत्रकार सम्मेलनको आयोजना गरेको थियो । सोही बैठकको निर्णय सार्वजनिक गर्दै अध्यक्ष कृष्ण थापाले कास्की २ मा ‘बामदेव नियती’ नदोहोरिने स्पष्ट पारे ।
नेकपाको दाबी, १३ हजार पाँच सय ४२ मतले जित्छौँ
कास्की नेकपा अध्यक्ष थापाले सोही कार्यक्रममा नेकपाको मतान्तर पनि घोषणा गरिदिए । अघिल्लो निर्वाचन (२०७४) मा यो क्षेत्रबाट रवीन्द्र अधिकारीले कांग्रेसका उमेदवार देवराज चालिसेलाई आठ हजार पाँच सय ४२ मतान्तरले हराएका थिए । उपनिर्वाचनमा त्योभन्दापनि पाँच हजार बढी मतान्तरले विद्याले चुनाव जित्ने दाबी थापाले गरे ।-बाह्रखरी
