बालेनको सचिवालय मर्मतसम्भार गर्न ५४ लाखको टेन्डर आवह्रान
काठमाडौं । काठमाडौं महानगरपालिकाका मेयर बालेन साहको सचिवालय मर्मत संम्भार गर्न टेन्डर आवह्रान गरिएको छ ।
शुक्रबार महानगरपालिकाकाे सार्वजनिक निर्माण विभागले एक सूचना निकालेर मेयरको सचिवालय मर्मत सम्भारको लागि टेन्डर आवह्रान गरेको हो ।
महानगरले ५३ लाख ८९ हजार ८३९ रुपैया ७१ पैसाको टेन्डर आवह्रान गरेको छ । आगामी असोज ७ गते १२ बजेसम्म टेण्डर हाल्ने अन्तिम समय दिइएको छ।
यसअघि उक्त प्लाजामा होटल रेस्टुरेन्ट पसल लगायतका व्यापार व्यवसाय सञ्चालनमा रहेको थियो । होटल रेस्टुरेन्ट खाली गराएपनि फोहोर भएकाले रङ रोगन लगायत मर्मत सम्भार गर्नुपरेको महानगरपालिकाले जनाएको छ ।
मेयर बालेन साहकाे कार्यकक्षमा यसअघि दाेहाेरी साँझ चलाइरहेकाे ठाउँमा मेयर बालेन साहकाे कार्यकक्ष बनाउने तयारी भइरहेकाे छ । मेयरको कार्यकक्षमा दुई–दुईवटा एसी, छुट्टै किचन, मिटिङ रुम, विश्राम कक्ष र सेवा प्रवाह कक्ष रहनेछन् । अहिले मेयरकाे कार्यकक्ष तयार नहुँदा मेयर साह राष्ट्रिय सभागृहबाट काम गर्दै आइरहेका छन् ।
यससँगै महानगरले दरबारमार्ग र ठमेलको सडक तथा फुटपाथ मर्मतको लागि पनि टेन्डर आवह्रान गरेको छ । सुन्धारास्थित जेडीए कम्पलेक्समा रहेको कार्यालय केही महिनाअघि काठमाडौं प्लाजामा सरेको थियो ।
नेपाल ट्रस्टसँग काठमाडौं प्लाजा महानगरले भाडामा लिएको हो । महानगरले मासिक ६० लाख ५० हजार रुपैयाँ भाडा तिर्ने गरी १० वर्षको सम्झौता गरेको थियो । काठमाडौं महानगरको आफनै कार्यालय टेकुमा दुई वर्षभित्र तयार हुँदैछ ।
