झलनाथको दाबी- अर्बौँ रुपैयाँ खर्चेर मान्छेलाई किनेर क्रिश्चियन बनाइँदैछ, यो संविधानविपरीत हो
काठमाडौं । नेकपा एकीकृत समाजवादीका सम्मानित नेता झलनाथ खनालले अर्बौँ रुपैयाँ खर्च गरेर नेपालमा मान्छेलाई धर्म परिवर्तन गराउने खेती भइरहेको दाबी गरेका छन् ।
नेकपा एसको पार्टी स्थापनाको दोस्रो वर्ष पुगेको अवसरमा केन्द्रीय कार्यालयमा शनिवार आयोजित कार्यक्रममा पूर्व प्रधानमन्त्री खनालले पैसाले किनेर मान्छेको धर्म परिवर्तन गराइएको बताए ।
खनालले भने– अहिले हेर्नुस् धरानमा निषेधाज्ञा छ, बिर्तामोडभन्दा यता दशौं हजार को जुलुस आएको छ । यहाँ साम्प्रदायिक सद्भाव भड्काउन विभिन्न शक्ति लागेका छन् । कहीँ गाई काटियो रे, कहीँ सुँगुर काटियो रे, कहीँ बाख्रा काटियो रे । यो किन हुन्छ भनेर मान्छे सडकमा आए । सरकार यसलाई किन नियन्त्रण गर्न सक्दैन रु पैसा बाँडेर,अर्बौँ रुपैयाँ बाँडेर यहाँ क्रिश्चियन बनाइँदैछ रे । मान्छेको इच्छा होला यो धर्म लिन्छु भन्ने तर यहाँ किनेर धर्म परिवर्तन गराइँदैछ ।
खनालले नेपालमा धर्म निरपेक्षताको बारेमा बहस आवश्यक रहेको भन्दै संविधानविपरीत धर्म परिवर्तनको काम बन्द हुनुपर्ने बताए ।
