धनकुटाका आधारभूत अस्पताल निर्माण अलपत्र
धनकुटा । आधारभूत अस्पताल निर्माणका लागि बजेट नआउँदा धनकुटामा निर्माणधीन अस्पताल अलपत्र परेका छन् ।
धनकुटाको महालक्ष्मी नगरपालिकामा निर्माण थालिएको १५ शैयाको आधाभूत अस्पताल बजेट अभाव र निर्माण व्यावसायीका कारण अलपत्र परेको छ ।
संघिय सरकारले पठाउनु पर्ने रमक समयमा नपठाउँदा र निर्माण व्यावसायीको लापरबाहिका कारण आधारभूत अस्पताल अलपत्र परेको हो । गत असार मै निर्माण सम्पन्न भई संचालन हुनु पर्ने अस्पतालको अहिले सम्म जग हाल्ने र केहि फिट पिल्लर ठड्याउने काम मात्र भएको छ ।
संघिय सरकारले पठाउनु पर्ने रमक समयमा नपठाउँदा र निर्माण व्यावसायीका कारण अस्पताल निर्माण कार्य ढिलाई भएको महालक्ष्मी नगरपालिकाका प्रमुख धुव्रराज रायले बताए । अहिले अस्पताल निर्माणका लागि समय थप गरिएको र अब भने समय मै काम सम्पन्न गर्ने गरि संयोजनको काम समेत भई रहेको नगर प्रमुख रायको भनाइ थियो ।
त्यस्तै धनकुटाको साँगुरीगढी गाँउपालिकामा आधारभुत अस्पतालको लागि जग्गा प्राप्ती र डिपिआर बाहेक अरु केहि काम अघि बढ्न सकेको छैन ।
अघिल्ला जनप्रतिनिधिले अस्पताल निर्माणको प्रक्रिया अगाडी नबढाएकाले काममा ढिलाई भएको र अहिले सबै प्रक्रिया पुरा गरी स्वास्थ्य मन्त्रालयमा फाइल पठाइसकेको छ तर मन्त्रालयवाट फाइल स्वीकृत गर्ने र बजेट व्यावस्थापनको स्पष्ट आधार नआएकाले काम अघि बढ्न नसकेको साँगुरीगढी गाउँपालिकाका अध्यक्ष जितेन्द्र रुम्दाली राईले बताए ।
धनकुटाकै चौबिसे गाँउपालिकामा पनि अस्पताल निर्माणको काम ४० प्रतिशत काम भएको छ । आधा पालिकाले आधा संघिय सरकारले खर्चगर्ने गरी सम्झौता भएकाले काम गर्न असहज भएको पालिकाले जनाएको छ । छथर जोरपाटी गाउँपालिकामा समेत बजेट नआए पछि काम रोकिएको छ । शहिदभुमी गाँउपालिका र पाख्रिवास नगरपालिकामा पनि प्रगती निक्कै न्युन छ ।
सरकारले एक साथ आधारभुत अस्पतालको शिलान्यास गरेको करीब ३६ महिना बितेको छ तर यो अबधीमा उपलब्धी भने लगभग शुन्य छ । स्थानीय सरकार संचालन ऐन २०७४ मा सबै स्थानीय तहमा आधारभुत अस्पताल अनिवार्य निर्माण गर्नुपर्ने व्यवस्था छ ।
स्वास्थ्यलाई छिटो छरितो तथा सर्वसुलभ बनाउन हरेक स्थानीय तहमा अस्पताल निर्माण गर्ने संघीय सरकारको योजना अनुसार स्थानीय तहमा अस्पताल निर्माणको प्रक्रिया अगाडि बढाइएको हो ।
