रारा गोल्डकप : ब्वाईजलाई हराउँदै एल एक्स सिटी फाइनलमा
देव याखा/जेठ ४,(चौबिसे)धनकुटा । चर्च ब्वाइज क्लब काठमाडौँलाई सडेन डेथमा हराउँदै एल एक्स सिटी मोरङ १२ औँ रारा गोल्ड कप फुटबल प्रतियोगिताको फाइनलमा प्रवेश गरेको छ ।
हिजो भएको दोस्रो सेमिफाइनल खेलमा चर्च ब्वाइजलाई सडेन डेथमा १–० गोल अन्तरले हराउँदै मोरङ फाईनलमा प्रवेश गरेको हो ।
निर्धारित समय तथा पेनाल्टी सुटमा समेत बराबरी गोल भएपछि खेल सडेन डेथ तर्फ धकेलिएको थियो ।
पहिलो हाफको नवौँ मिनेटमा एल एक्स सिटीका प्रदीप लामाले पहिलो गोल गर्दै १–० को अग्रता दिलाएका थिए ।
पहिलो हाफको नतिजा उल्टाउँदै दोस्रो हाफमा चर्च ब्वाइज समीर तामाङले ५३ र ७७ औ मिनेटमा गोल गर्दै आफ्नो टिमलाई २–१ को अग्रता दिलाए ।
लगभग हारको अवस्थामा पुगेको एल एक्स सिटी ६ मिनेट थप गरिएको अतिरिक्त समयको पाँचौँ मिनेटमा पाएको पेनाल्टीलाई सदुपयोग गर्दै जर्सी नम्बर ४ का खेलाडी छिरिङ गुरुङले गोल गर्दै खेललाई २–२ गोलको बराबरी बनाउनुभयो ।
पेनाल्टी सुट आउटमा समेत दुवै टिम वाट ४–४ गोल हुँदा दुवै तर्फका गोल किप्परले एक एक प्रहार विफल बनाएका थिए ।
त्यस पछि खेल सडेन डेथमा धकेलियो । पहिले प्रहार गर्न आएका चर्च ब्वाइज क्लबका समीर तामाङले गरेको प्रहार पोस्ट बाहिरिन पुग्यो ।
तर एल एक्स सिटीको खेलाडी छिरिङ गुरुङले गोल गर्दै आफ्नो टिमलाई जित दिलाउनुभयो ।
प्रतियोगिताको उपाधिका लागी आइतबार एल एक्स सिटी मोरङले बिर्तामोड युनाइटेड क्लब झापा बीच खेल हुनेछ ।
विजेताले नगद ७ लाख र उपविजेताले ३ लाख रुपैयाँ सहित ट्रफि मेडल, कप, प्रमाणपत्र हात पार्ने आयोजक समितिका सचिव जीवन कटुवालले जानकारी दिनुभयो । (प्रशिक्षार्थी पत्रकार)
