बेलबारीको अनाथलयलाई लेटाङ ग्रीनभ्याल्लिको आर्थिक सहयोग
बेलबारी । सामाजिक उत्तरदायित्व र मानवीय सेवाभाव जगाउने उद्देश्यका साथ लेटाङको ग्रीन भ्याल्ली एकाडेमि विद्यालयका विद्यार्थीहरूले एक परोपकारी कार्य सम्पन्न गरेका छन्। विद्यालयको कक्षा १० मा अध्ययनरत प्रतिनिधि विद्यार्थी र शिक्षकहरूको टोलीले बेलबारीको बालगृहमा पुगी सहयोग हस्तान्तरण गरेका हुन्।
पुष ६ गते आइतबारका दिन आयोजित एक संक्षिप्त कार्यक्रमका बीच विद्यार्थीहरूले बालगृहका बालबालिकाहरूका लागि नगद १५ हजार रुपैयाँ सहित खाद्यान्न (दाल र चामल) सहयोग स्वरूप प्रदान गरेका छन। विद्यार्थीहरुले भ्रमणबाट उब्रेको रकमले सहयोग गरेको बताएका छन।
बालगृह पुगेका विद्यार्थी र शिक्षकहरूलाई बालगृहका सञ्चालक निरु साम्पाङ राई तथा त्यहाँ आश्रित नानीहरूले न्यानो स्वागत गरेका थिए। सो अवसरमा विद्यार्थीहरूले बालगृहका बालबालिकाहरूसँग समय बिताउँदै उनीहरूको अवस्थाबारे जानकारी लिएका थिए।
सहयोग ग्रहण गर्दै सञ्चालक निरु साम्पाङ राईले विद्यालय परिवार र विद्यार्थीहरूले देखाएको यो उदारताप्रति आभार प्रकट गर्नुभयो। माया र सद्भाव साटासाट गरिएको उक्त भेटघाट निकै सुखमय र भावनात्मक रहेको सहभागीहरूले बताएका छन्।
