ताप्लेजुङको भन्ज्याङ बजारका आगलागी पीडितलाई नेपाली कम्युनिष्ट पार्टीको आर्थिक सहयोग
ताप्लेजुङ, पुस १३ गते । ताप्लेजुङको सिदिङ्वा गाउँपालिका–४ भन्ज्याङ बजारका आगलागी पीडितलाई नेपाली कम्युनिष्ट पार्टी ताप्लेजुङले आर्थिक सहयोग गरेको छ । पार्टीले आगलागी पीडित लक्ष्मी तामाङलाई नगद १५ हजार रुपियाँ आर्थिक सहयोग गरेको हो ।
आगलागी पीडित तामाङलाई सान्त्वना स्वरुप थोरै आर्थिक सहयोग गरिएको नेपाली कम्युनिष्ट पार्टीका केन्द्रीय सदस्य खेल प्रसाद बुडाक्षेत्री परागले बताउँनुभयो । एकता सन्देश सभाको सिलसिलामा सिदिङ्वा गाउँपालिकाको केन्द्र साब्लाखु भन्ज्याङ बजार पुग्नु भएका नेता बुडाक्षेत्री लगायतका कार्यकर्ताहरूले तामाङलाई आर्थिक सहयोग हस्तान्तरण गर्नुभएको हो ।
गत मंसिर १२ गते साँझ तामाङको घरमा आगलागी हुँदा ५० लाख बढीको क्षति भएको थियो । विद्युत सर्ट भएर तामाङको पाँच तले टिनले छाएको पक्की घरमा आगलागी हुँदा टिनको छाना, काठपात, मेसिनरी सामग्री, ल्यापटप, कम्प्युटर, प्रिन्टर, ब्याट्री र सोलार जडानका उपकरण जलेर नष्ट भएका भएको थियो ।-रेडियो काबेली
