भोलि र पर्सी धनकुटाको पाख्रीवास-८ मा निःशुल्क स्वास्थ्य शिविर
धनकुटा खबर, पौष १९ । धनकुटाको पाख्रीवास नगरपालिका ८ मुगामा भोलि र पर्सी दुईदिन निःशुल्क स्वास्थ्य शिविर सञ्चालन गरिने भएको छ ।
पाख्रीवास नगरपालिकाको आर्थिक सहयोग तथा पाख्रीवास नगरपालिका ७ र ८ नं वडा को संयुक्त आयोजनामा शिविर सञ्चालन गर्न लागिएको हो । शिविरमा विरा मेडिकल कलेज तथा टिचिङ हस्पिटल विराटनगरको प्राविधिक सहयोग रहने ८ नं वडाध्यक्ष सिताराम राईले जानकारी दिनुभयो ।
ग्रामीण भेगका सर्वसाधारणहरुलाई स्वास्थ्यसेवा दिने लक्षका साथ आयोजना गर्न लागिएको शिविरमा सम्पूर्णलाई आफ्नो स्वास्थ्य जाँच गराई लाभ लिनुहुन आह्वान गरिएको छ ।
शिविर भोलि विहान १० वजेदेखी मुगा स्वास्थ्यचौकी भवनमा सञ्चालन हुने छ । शिविरमा स्त्री तथा वालरोग,आँखाको समस्या लगायत विभिन्न रोगको उपचार सेवा प्रदान गरिने स्वास्थ्यचौकी व्यवस्थापन समितिले जनाएको छ ।
