ताप्लेजुङको सुकेटार विमानस्थलमा हवाई उडान थप
ताप्लेजुङ, पुस १७ गते । ताप्लेजुङको सुकेटार विमानस्थलमा हवाई उडान थप भएको छ । सातामा दुई दिनमात्र उडान भइरहेको सुकेटार एयरपोर्टमा पुनः एक दिन तालिका थप भएको हो ।
नेपाल वायु सेवा निमग कार्यालय ताप्लेजुङका स्टेसन इन्चार्ज नारायण कुमार कार्कीका अनुसार आगामी सातादेखि काठमाडौँ–ताप्लेजुङ–काठमाडौँका लागि बुधबार समेत उडान हुने गरी नयाँ तालिका प्राप्त भएको छ । यसअघि सातामा दुई वटा मात्र उडान हुँदै आइरहेको थियो । अब साताको सोमबार, बुधबार र शुक्रबार गरी तीन पटक उडान हुने भएको छ ।
यात्रुको चापलाई मध्यनजर गर्दै उडान तालिका थप गरिएको कार्यालयले जनाएको छ । केन्द्रीय कार्यालयबाट जनवरी महिना भरिका लागि बुधबार समेत उडान हुने गरी तालिका प्राप्त भएको इञ्चार्ज कार्कीको भनाइ छ । विगतका वर्षहरुमा विराटनगर–ताप्लेजुङ–विराटनगर समेत उडान हुने गरेको थियो । हाल यो उडानका लागि भने कुनै निर्णय भइनसकेको कार्यालयले जनाएको छ ।
ताप्लेजुङबाट काठमाडौँसम्मका लागि हाल नौ हजार ४०३ रुपियाँ भाडा दर तोकिएको कार्यालयले जनाएको छ ।-रेडियो काबेली
