भरतपुर महानगरपालिका: एमालेले निकाल्यो विजय जुलुस
भरतपुर, ३ जेठ । चार वटा महानगरपालिकामा मतगणना जारी भए पनि यतिबेला सबैको ध्यान भरतपुर महानगरपालिकाले खिचेको छ । खासगरि, मेयरको उम्मेदवार बनेकी प्रधानमन्त्रीकी पुत्री रेणु दाहाललाई जिताउन काँग्रेस र माओवादीबीच गठबन्धन बनेदेखि नै यहाँ धेरैले चासोको रुपमा हेरेका छन् । माओवादी र काँग्रेसको गठबन्धन छ भने नेकपा एमाले, राप्रपा लगायतका अन्य दलहरु चुनावी मैदानमा होमिएका छन् ।
काँग्रेस र माओवादीको गठबन्धन भए पनि एमालेका मेयरका उम्मेदवार देवी ज्ञवाली फराकिलो मत अन्तरले अगाडि छन् । वडा नम्बर दुईको मत गन्दासम्म देवी ज्ञवालीले ३८७० मत पाएका छन् । माओवादी केन्द्रकी मेयर पदकी उम्मेदवार रेणु दाहालले १४ सय मतले पछाडि छिन् । उनले २४६१ मत पाएकी छन् ।
उपमेयरमा पनि एमालेको अग्रता कायमै छ । उपमेयरमा एमालेकी दीब्या शर्माले ३३१३ र कांग्रेसकी पार्वती शाहले २९७१ मत पाएकी छन् ।
एमालेले भर्खरै दुई नम्बर वडाको वडाअध्यक्ष जितेको छ । वडा नम्बर दुईका एमालेका अध्यक्षका उम्मेदवार पूर्णबहादुर श्रेष्ठ ५७२ मत बढी ल्याएर विजयी भए । उनले १९२६ मत ल्याए भने काँग्रेसका उम्मेदवारले १३५४ मत पाए । विजयी सुरुवात गरेपछि एमालेले भरतपुरमा विजय जुलुस निकालेको छ । जुलुसमा नेकपा एमालेका नेताहरु पनि सहभागी भए ।
यसअघि वडा नम्बर एकमा काँग्रेसका उम्मेदवार अध्यक्षमा निर्वाचित भएका थिए । उनले गठबन्धनका कारण आफ्नो भोट पाएर वडाअध्यक्ष जिते पनि मेयरको उम्मेदवारलाई भने अन्तरघात गरेको माओवादी केन्द्रको आरोप छ । काँग्रेस कार्यकर्ताले जुलुस निकाले पनि गठबन्धनमै रहेको माओवादी जुलुसमा सहभागी भएन । काँग्रेसले अन्तरघात गरेका कारण रेणु १४ सय भन्दा बढी भोटले पछाडि परेको भन्दै माओवादी र काँग्रेसबीच भरतपुरमा खटपट सुरु भएको छ । दैनिक नेपाल बाट
