भारतीय हस्तक्षेपविरुद्ध सीमा क्षेत्रमै प्रदर्शनमा उत्रिए सयौं युवा, भारतीयका पसल र गाडी तोडफोड
महेन्द्रनगर, २७ फागुन । भारतीय सुरक्षाकर्मी (एसएसबी)को गोली लागेर गोविन्द गौतमको मृत्यु भएपछि नेपाल भारत सीमा क्षेत्रमा प्रदर्शन भएको छ ।
गौतमले ज्यान गुमाएको कञ्चनपुरको आनन्दबजार नजिकैको सीमा नाका शुक्रबार विहानै संयौ नेपाली युवाहरु भारतीय ज्यादतिविरुद्ध राष्ट्रिय झन्डा बोकेर प्रदर्शनमा उत्रिएका हुन् ।
प्रदर्शनमा उत्रिएका युवाले भारतीय नम्बर प्लेटको एउटा मोटरसाइकल जलाइदिएका छन् । भारतीयले नेपाली भूभागमा सञ्चालन गरेका पसल तोडफोड गरिदिएका छन् ।
घटनाको विरोधमा कैलालीको गौरीफन्टा नाकामासमेत शुक्रबार बिहानैदेखि सयौं नेपाली युवाले प्रदर्शन गरिरहेका छन् । अप्रिय घटना हुन नेपाल प्रहरीले उनीहरुलाई रोक्ने प्रयास गरिरहेको छ । उता भारतीय प्रहरीहरु सीमा क्षेत्रमा अलर्ट भएर बसेका छन् ।
सशस्त्र प्रहरी नायब उपरीक्षक प्रेम रावलका अनुसार सीमा नाकामा करिब ८ युवा प्रदशर्नमा उत्रिएका छन् ।
पुनर्वास–८, आनन्दबजारनजिक सीमामा निर्माणाधीन कल्भर्टबारे विवाद हुँदा भारतीय सुरक्षाकर्मीले हानेको गोली लागी बिहीबार पुनर्वास–८ आनन्दबजार निवासी ३० वर्षीय गोविन्द गौतमको मृत्यु भएको थियो । भारतीय सुरक्षाकर्मीले नेपाली भूभागमा घुसेर नेपालीमाथि गोली चलाउँदा ६ जना घाइते छन् ।
