कार्यालय प्रमुखले अटेर गरेको भन्दै पशुसेवा कार्यालय धनकुटामा तालाबन्दी
धनकुटा खबर, फागुन २७ । मन्त्रालयले फिर्ता बोलाएपनि अटेर गरेर बसेको भन्दै पशुसेवा कार्यालय धनकुटामा किसानहरुले तालाबन्दी गरेका छन् ।
पशु विकास मन्त्रालयले ३ दिन भित्र मन्त्रालयमा हाजिर हुन परिपत्र गरेपनि अटेर गरेर बसेका प्रमुख नन्दलाल बर्मालाई अवरोध गर्न शुक्रबार किसानहरुले तालबन्दी गरेका हुन् ।
शुक्रबार पशु सेवा कार्यालयको प्रमुख, योजना शाखा र कार्यक्रम हलमा तालाबन्दी गरेको कृषि ब्यबसायी महासंघका अध्यक्ष सरेन्द्र पौडेलले बताउनु भयो ।
मन्त्रालयले सरुवा गरेपनि विलभर्पाइ मिलाउनको लागि अटेर गरेर बसेकाले तालाबन्दी गर्नु परेको पौडेलले बताउनु भयो ।
कार्यालयमा आउदा किसानलाई अभद्र ब्यबहारको कारण माघ १९ गते देखि आन्दोलनमा उत्रेका किसानको दवावको कारण कार्यालय प्रमुख बर्माको मन्त्रालयले काज सरुवा गरेका थियो ।
किसानहरुको आन्दोलनको कारण क्षेत्रीय पशु सेवा निर्देशनालय विराटनगरबाट माघ २१ गते छानविन गर्न आएको टोली आएका थियो । उक्त टोलीको प्रतिवेदनको आधारमा कार्यालय प्रमुख बर्मालाई सरुवा गरिएको थियो ।
तर ३ दिन अगाडी पत्र आएपनि जिल्ला छाडेर नहिडेपछि थप आन्दोलन गर्नु परेको किसानहरुले बताए ।
किसानहरुले गरेको तालाबन्दीको कारण पशु सेवा कार्यालयको योजना तर्जुमा कार्यक्रम रोकिएको छ ।
