ओलीले भने,- प्रचण्डलाई सरकार छोड्न मन छैन, देउवालाई प्रधामन्त्री बन्न हतार
काठमाण्डौं, ९ जेठ । सत्तारुढ र विपक्षी दलबीच भएको छलफल सकिएको छ । प्रधानमन्त्री निवास बालुवाटारमा भएको छलफलमा प्रमुख प्रतिपक्षी नेकपा एमालेले स्थानीय तहको संख्या किन थप गरिएको हो ? भन्दै प्रश्न गरेको थियो ।
बैठकपछि पत्रकारसँग कुरा गर्दै नेकपा एमालेका अध्यक्ष केपी शर्मा ओलीले भने,‘बैठकमा स्थानीय तहको संख्या थप र बजेटका बारेमा छलफल भएको थियो हामीले संविधानको कुन धाराको आधारमा स्थानीय तहको संख्या थप गरियो ? भनेर सोध्यौं ।’
उनले नेकपा एमालेलाई हराउने षडयन्त्रस्वरुप यस्तो निर्णय सत्तापक्षले गरेको भन्दै आक्रोश व्यक्त गरे । ‘एमालेलाई हराउने डिजाइनमा संख्या थप गर्ने काम गरियो । स्वार्थका पछि लागेर जहाँ जहाँ एमालेले जित्ने ठाउँ छ त्यहाँ भत्काउने काम गरिएको छ,’ उनले भने, ‘पहिले नै हामीले विराटनगर र वीरगन्जलाई महानगर बनाउन भन्दा कांग्रेसले मानेन तर अहिले चुनावको मुखमा संख्या थप गरिएको छ । यो उपयुक्त भएन ।’
अहिले पनि सत्तारुढ दलका कोही नेतालाई प्रधानमन्त्री पद छाड्न मन नभएको र केहीलाई नभई नहुने अवस्था रहेको टिप्पणी गरे । ‘उहाँहरु सत्ता हेरफेरको विषयमा केन्द्रित हुनुहुन्छ,’ उनले भने ।
नाम नलिए पनि उनले प्रचण्ड र देउवालाई लक्षित गर्दै भने ‘कसैलाई छाड्न मन छैन, कसैलाई प्रधानमन्त्री बन्न हतार छ ।’
