मतपत्रच्यात्नेलाई कानुनी कारवाही गरी मत गणना सुरु नगरेसम्म एमालेले सदन अवरोध गर्ने
काठमाडौं, १७ जेठ । महान्याधिवक्ता रमण श्रेष्ठसमेतको मिलेमतोमा भरतपुर महानगरपालिकाको मत गणनामा मतपत्र च्यात्ने र पुन मतदान गर्ने सत्तापक्षको योजना अनुरुप मतपत्र च्यातिएपछि प्रमुख विपक्षी दल एमालेले भरतपुरको मतगणना नगरेसम्म संसद चल्न नदिने भएको छ । मतपत्र च्यातेर पुन मतगणना गराउने लोकतन्त्र र निर्वाचन पद्दति विरोधी कार्यमा महान्याधिवक्ता श्रेष्ठ, माओवादी मतगणना प्रतिनिधि र निर्वाचनमा खटिएका अधिकृत कविप्रसाद न्यौपानेको मिलेमतो थियो ।
महान्याधिवक्ता श्रेष्ठले तयार पारेको योजना अनुसार माओवादीका गणना प्रतिनिधिले मतपत्र च्यात्ने र पुन मतदानका लागि आधार तयार गर्नेगरी निर्वाचन अधिकृतले मतगणनास्थल कब्जा भएको प्रतिक्रिया दिएर भरतपुर १९ मा पुन मतदान गराउने योजना सत्तारुढ गठबन्धनले बनाएको थियो ।
सोही योजना अनुसार माओवादीले मतपत्र च्यातेपछि भरतपुरको मतगणना स्थगित गरिएको छ भने सत्तारुढ गठबन्धन तथा भरतपुरको चुनावी गठबन्धनमा रहेका कांग्रेस र माओवादीले पुन मतदान गराउन माग गरेका छन् । एमालेले भने मतपत्र च्यात्नेलाई कारवाही गर्दै मतगणना सुचारु गर्न माग गरेको छ ।
भरतपुरमा मतपत्र च्यात्नेलाई कानुनी कारवाही गरी मतगणना सुरु नगरेसम्म संसदको कारवाही अगाडि बढाउन नदिने एमालेले जनाएको छ । भरतपुर प्रकरण लोकतन्त्र र निर्वाचन पद्दतिमाथिको आक्रमण रहेको भन्दै एमालेले सो प्रकरणको टुंगो नलागि सदनको कारवाही अघि बढाउन नदिने जनाएको हो ।
