चितवनमा बस, माइक्रो र ट्रक ठोक्किँदा १० जना घाइते
चितवन । चितवनको इच्छाकामना गाउँपालिका–४ धारापानीस्थित पृथ्वी राजमार्गमा बस, माइक्रो र ट्रक एकआपसमा ठोक्किँदा १० जना घाइते भएका छन्।
कात्तिक १० गते बिहान करिब ९ः२० बजे काठमाडौंमाबाट मुग्लिङतर्फ जाँदै गरेको बागमती प्रदेश ०३–००१ ज १२५९ नम्बरको माइक्रोलाई विपरीत दिशाबाट आउँदै गरेको बागमती प्रदेश ०३–००१ ख २७७७ नम्बरको बसले ठक्कर दिएको थियो।
माइक्रोलाई ठक्कर दिएपछि अनियन्त्रित भएको बस सोही दिशातर्फ जाँदै गरेको प्रदेश १–०२–००२ ख ६१३ नम्बरको ट्रकमा समेत ठोक्किएको प्रहरीले जनाएको छ।
दुर्घटनामा बस र माइक्रोमा सवार १० जना घाइते भएका छन्। घाइतेहरूलाई उपचारका लागि कुरिनटारस्थित सशस्त्र प्रहरी बलको पृथ्वी हाईवे ट्रमा सेन्टर र इच्छाकामना गाउँपालिका अस्पतालमा लगिएको छ।
इच्छाकामना गाउँपालिका अस्पतालमा उपचाररत घाइतेमध्ये माइक्रोमा सवार बारा जिल्लाको निजगढ निवासी ४२ वर्षीय कुमार जोशी, नवलपुरको कावासोती नगरपालिका–३ निवासी ३८ वर्षीय खेमबहादुर गुरुङ र ४२ वर्षीय मुराबहादुर कुमाल रहेका छन्।
त्यसैगरी, बसमा सवार झापाको दमक नगरपालिका–३ निवासी ४८ वर्षीया कल्पना पोखरेल र बिर्तामोड नगरपालिका–५ निवासी २२ वर्षीय रोमन भट्टराई पनि घाइते भएका छन्।
दुर्घटनामा घाइते भएका थप पाँच जनाको नाम र ठेगानासहितको विवरण आउन बाँकी रहेको छ। दुर्घटनाबारे थप अनुसन्धान भइरहेको प्रहरीले जनाएको छ।
