झापाको कन्काई नगरपालिकाको प्रमुखमा एमालेका पोख्रेल विजयी
दमक, असार १९ । झापाको कन्काई नगरपालिकाको प्रमुखमा एमालेका राजेन्द्र पोखरेल विजयी भएका छन्।
उनले आठ हजार ४१६ मत प्राप्त गरेर विजयी भएका हुन्। उनका निकटतम प्रतिद्वन्द्वी नेपाली कांग्रेसका एकराज उप्रेतीले छ हजार १९७ मत प्राप्त गरे। नगरको उपप्रमुखमा एमालेकै मञ्जु प्रसाईं विजय भइन्।
उनले आठ हजार ५७६ मत प्राप्त गरिन् भने उनकी निकटतम प्रतिद्वन्द्वी नेपाली कांग्रेसकी कविता बस्नेतले छ हजार ५७९ मत प्राप्त गरिन्। अन्य वडाहरूमा भने मिश्रित परिणाम आएको छ। एमालेले वडा नम्बर १, २, ४, ५, ७ र ८ मा वडा अध्यक्षमा जीत हात पारेको छ। यस्तै कांग्रेसले ३, ६ र ९ वडामा वडा अध्यक्षमा विजयी भएको छ।
वडा नम्बर १ मा एमालेका रोशन पोखरेलको प्यानल नै विजयी भएको छ। २ नम्बर वडामा पर्शु गिरीको प्यानल नै विजयी भएको छ भने ३ नम्बर वडामा नेपाली कांग्रेसका रुद्र चिमरिया विजयी भएका छन्। यस्तै, वडा नम्बर ४ मा एमालेका गोविन्द पौडेलको प्यानल नै विजयी भएको छ। वडा नम्बर ५ को वडा अध्यक्षमा एमालेका कृष्ण राईको प्यानल नै विजयी भएको छ भने वडा नम्बर ६ मा कांग्रेसका लक्ष्मीप्रसाद ओलीको प्यानल नै विजयी भएको छ।
वडा नम्बर ७ मा एमालेका लीला कन्दङ्वाको प्यानल विजयी भएको छ। यसैगरी वडा नम्बर ८ मा एमालेको प्रेमप्रसाद कटुवालको प्यानल नै विजय भएको छ। वडा नम्बर ९ मा नेपाली कांग्रेसका प्रेम राजवंशी विजयी भएका छन्।
