हाइड्रोजन बमको सफल परीक्षण भएको उत्तर कोरियाको दाबी
एजेन्सी, भदौ १८ । उत्तर कोरियाले हाइड्रोजन बमको सफल परीक्षण गरेको दाबी गरेको छ ।
उत्तर कोरियाको राष्ट्रिय टेलिभिजनले हाइड्रोजन बमको सफल परीक्षण गरिएको बताएको हो । परीक्षण गरिएको हाइड्रोजन बम मिसाइल लोड गर्न सकिने खालको रहेको बताएको समाचार संस्था एएफपी र रोयटर्सले जनाएका छन् ।
हाइड्रोजन बम परीक्षणका लागि उत्तर कोरियाका नेता किम जोङ–उनले निर्देशन दिनुभएको हो । उत्तर कोरियाको राष्ट्रिय टेलिभिजनले नेता किमले बम परीक्षणका लागि निर्देशन सम्बन्धी पत्रमा हस्ताक्षर गर्दै गरेको तस्बिर पनि सार्वजनिक गरेको छ ।
उत्तर कोरियाको सरकारी समाचार संस्था केसिएनएले हाइड्रोजन बमको सफल परीक्षणले देशको परमाणु कार्यक्रमको अन्तिम लक्ष्य पुरा हुने देखिएको दाबी गरेको छ । परीक्षणको क्रममा रेडियोएक्टिभ सामग्री लिक पनि नभएको र वरपरको वातावरणमा पनि प्रभाव नपरेको केसिएनएले दाबी गरेको छ ।
ठूलो क्षमतासहितको बमका साथमा पछिल्लो परीक्षण भएको केसिएनएले जनाएको छ । ६ दशमलव ३ रेक्टर स्केलको भूकम्प जाने गरी उत्तर कोरियाले गरेको हाइड्रोजन बमसहितको परमाणु परीक्षणपछि जापान तथा दक्षिण कोरियाले सुरक्षा सतर्कता बढाएका छन् ।
यस्तै दक्षिण कोरिया सुरक्षा अधिकारीको बैठक बसेको छ । दक्षिण कोरियाले अबको कदमका बारेमा अमेरिकासँग परामर्श गरिरहेको छ ।
