‘राजपाका नेताहरुले मधेश बिर्से, पैसामा बिके’
काठमाडौं, २० भदौ । प्रदेश नम्बर २ को स्थानीय तह निर्वाचनको मनोनयन दर्ताको अघिल्लो दिन राष्ट्रिय जनता पार्टीका महासचिव तथा बीरगंजका प्रभावशाली नेता विमल श्रीवास्तवले उक्त पार्टी छाडेका छन् ।
उनी राजपा परित्याग गरी बिजय गच्छेदार नेतृत्वको लोकतान्त्रिक फोरममा प्रवेश गरेका छन् । उनलाई प्रवेश गर्नासाथ गच्छेदारले बीरगंज महानगरपालिकाको मेयर उम्मेदवार बनाएको छ ।
राजपाबाट बीरगंज महानगरपालिकाको मेयरमा उम्मेदवारका चर्चामा रहेका श्रीवास्तवलाई उक्त पार्टीले टिकट नदिएपछि उनी आक्रोसित भएर लोकतान्त्रिक फोरममा प्रवेश गरेका हुन् । राजपाले श्रीवास्तावलाई टिकट दिने आश्वासन दिएर आज राजेशमान सिंहलाई दिने निर्णय गरेको थियो ।
सिंहलाई टिकट दिएपछि आज बीरगंंजमा पार्टीका कार्यकर्ताहरुको भेलामा श्रीवास्तवले ६ वटा पार्टी मिलेर बनेको राजपाका नेताहरु पैसामा बिकेको आरोप लगाएका छन् । राजपाका नेताहरुले मधेश र मधेशी जनताको हक अधिकार बिर्सेर पैसामा बिकाउ भए ।
राजपाका कार्यकर्ताको भावना विपरीत पैसामा टिकट बिक्री गरे, श्रीवास्तवले भने, राजपाले मधेश मुद्दा बिर्सिएका कारण पनि अर्को पार्टीबाट मधेशको मुद्दा स्थापित गर्नका लागि चुनावमा उम्मेदवारी दिने निर्णयमा पुगेका छौ । भोलि हुने उम्मेदवारी मनोनयनमा जुट्न पनि उनले राजपाका कार्यकर्तालाई आग्रह गरेका छन् । दृश्टीन्यूजबाट ।
