जन्मदिन मनाएर फर्कंदै गरेका स्ववियु सदस्य पोखरेलको दुर्घटनामा मृत्यु
विराटनगर । जन्मदिन मनाएर घर फर्कने क्रममा सवारी दुर्घटनामा परी विराटनगरस्थित महेन्द्र मोरङ आदर्श बहुमुखी क्याम्पसका स्वतन्त्र विद्यार्थी युनियन (स्ववियु) सदस्य अंकित पोखरेलको मृत्यु भएको छ।
बुधबार मध्यराति करिब १२ बजे विराटनगर महानगरपालिका–१० स्थित निर्मल जल उद्योगनजिक मोटरसाइकल दुर्घटना हुँदा २५ वर्षीय पोखरेलको मृत्यु भएको वडा प्रहरी कार्यालय विराटनगरले जनाएको छ।
प्रहरीका अनुसार मोटरसाइकल अनियन्त्रित भई दुर्घटना हुँदा पोखरेल गम्भीर घाइते भएका थिए। उनलाई बेहोस अवस्थामा उपचारका लागि विराट नर्सिङ होम पुर्याइएको थियो। उपचारका क्रममा चिकित्सकले उनलाई मृत घोषणा गरेका थिए।
विराटनगर महानगरपालिका–१ निवासी पोखरेल जन्मदिन मनाएर घर फर्कने क्रममा दुर्घटनामा परेको बताइएको छ।
उनी महेन्द्र मोरङ आदर्श बहुमुखी क्याम्पसको स्ववियु सदस्य हुनुका साथै जिपी कोइराला फाउन्डेसन मोरङको युवा कार्यदलका अध्यक्षसमेत रहिसकेका थिए।
