पाकिस्तानी सीमा क्षेत्र पार गरी भारतीय सेनाद्वारा आक्रमण
नयाँदिल्ली । भारतीय सेनाले पाकिस्तानी सीमा क्षेत्र पार गरी आक्रमण गरेको दाबी गरेको छ । केही दिनअघि पाकिस्तानी सेनाको फायरिङमा आफ्ना सैनिक मारिएपछि यस्तो आक्रमण गरिएको बताइएको छ ।
आफ्ना १० जवानले जम्मु कश्मीरको पुन्छ क्षेत्रमा नियन्त्रण रेखा पार गरी गरेको कारबाहीमा तीनजना सैनिक मारिएको भारतीय सेनाले दाबी गरेको छ । गत शनिवार कश्मीरको रजौरी क्षेत्रमा पाक बोर्डर एक्शन टिमले गरेको फायरिङमा भारतीय सेनाका मेजरसहित तीन जवानको मृत्यु भएको थियो ।
त्यसकै बदला लिन यस्तो आक्रमण गरिएको भारतीय सैन्य सूत्रले जानकारी दिएको छ । यो स्थानीय तहको सामरिक अपरेशन थियो । त्यसको नेतृत्व स्थानीय तहमै भएको बताइएको छ । यो सर्जिकल स्ट्राइक नभएको भारतको कथन छ । यसमा सीधै विशिष्ट पाकिस्तानी सेनाको चौकीलाई निशाना बनाइएको थियो । उक्त अपरेशनमा भारततर्फ कुनै क्षति भएको छैन । सेनाले यो कारबाहीको विस्तृत विवरण सार्वजनिक गरेको छैन । शनिवार पाक सेनाले नियन्त्रण रेखाभन्दा ४ सय मिटर भित्र पसेर आक्रमण गरेको थियो ।
यसैगरी भारत प्रशासित कश्मीरमा अर्ध सैन्य बलसँग भएको दोहोरो गोली हानाहानमा मंगलबार एका वरिष्ठ आतंककारीको मृत्यु भएको छ । भारत प्रशासित कश्मीरको ग्रीष्मकालीन राजधानी श्रीनगरबाट करिब २८ किलोमिटर दक्षिणमा रहेको पुल्वाना जिल्लाको समबोओरा गाउँमा दोहोरो गोली हानाहान भएको थियो ।
पुल्वाना जिल्लामा गस्तीमा खटिएको भारतीय अर्ध सैन्य बलको कारबाहीमा परी लस्कर ए तोएबाको वरिष्ठ कमान्डर जैस इ मोहमद मारिएको पुष्टि भएको प्रहरीले जानकारी दिएको छ । प्रहरीका अनुसार विशेष गुप्तचरको सूचनाअनुसार कारबाही शुरु गरिएको थियो । ती कमान्डरले श्रीनगर जम्मुको राजमार्गका कतिपय क्षेत्रमा आक्रमणको योजना बनाएको दाबी गरिएको छ । स्थानीय प्रहरीका अनुसार कारबाहीका क्रममा एकजना प्रहरी पनि घाइते भएका छन् ।
