जरुवा र भूमिगत मुहान सुकेपछि डिप बोरिङ्गबाट पानी
धनकुटा खबर । बर्षैदेखि स्थानीयले खानेपानीका लागि प्रयोग गर्दै आएका जरुवा र भूमिगत मुहान सुकेपछि धनकुटामा खानेपानीका लागि डिप बोरिङ्ग प्रविधिको चलन बढ्न थालेको छ ।
खर्चिलो भएपनि पानीका स्रोत सुक्दै गएका सुख्खाग्रस्त स्थनमा डिप बोरिङ्ग प्रविधि लोकप्रिय बन्दै गएको हो । खानेपानीको चरम अभाव खेप्दै आएको धनकुटा नगरपालिकाको हिले बजारका तीन स्थानमा डिप बोरिङ्ग मेसिन जडान गरि पानी तान्न थालिएको छ ।
गतबर्ष ४५ लाख रुपैयाँ खर्चेर हिलेकै न्यूरोडमा संचालनमा ल्याएइको डिप बोरिङ्गबाट यहाँका सात सय ५० घर उपभोत्ताले खानेपानी सुविधा लिइरहेका छन् । हिले बजारको दुइ किलोमिटर क्षेत्रमा मात्रै तीनवटा डिप बोरिङ्ग मेसिन संचालनमा रहेको हिले डिप बोरिङ्ग योजना धनकुटाका सचिब अमित लो तामाङ्ग जानकारी दिए ।
खानेपानीको अभावमा रहेका धनकुटाको शहिदभूमि र छथरजोरपाटी गाउँपालिकामा पनि यो प्रविधि प्रयोगका लागि अध्ययन भैरहेको छ । समुन्द्रि सतहबाट एकहजार ६ सय मिटरको उचाइमा प्रति सेकेन्ड १० लिटर पानी तान्न सफल भएपछि अन्य स्थानका उपभोक्ता पनि यो प्रविधि प्रति आकर्षित भएका हुन् ।
खानेपानी संकट चुलिदै गएपनि धनकुटा स्थित पूर्वाञ्चल खानेपानी क्षेत्रीय अनुगमन तथा सुपरिवेक्षण कार्यालयको तथ्याङ्गले धनकुटामा खानेपानीको पहुँमा रहेका उपभोत्ताको संख्या बढेर ८४ प्रतिशत पुगेको देखाएको छ ।
