धनकुटाका स्थानीय तहले गरे करिव ५ करोड राजश्व संकलन !, कुन तहले कति गरे, अबको लक्ष कति ?
धनकुटा खबर । धनकुटाका स्थानीय ७ तहले करिव ५ करोड राजश्व संकलन गरेका छन् ।
गत आर्थिक वर्ष २०७४-७५ मा सम्पत्ति, मालपोत, व्यवसाय, वहाल कर, सिफारिस दस्तुर लगायत शिर्षकबाट ४ करोड ७९ लाख ३४ हजार १ सय ६० रुपैया राजश्व संकलन गरेका छन् ।
धनकुटा नगरपालिकाले जिल्लामा सबैभन्दा धेरै २ करोड २९ लाख ९ हजार १ सय ४९ रुपैया राजश्व संकलन गरेको छ । नगरपालिकाले चालु आवमा २ करोड ६० लाख रुपैया राजश्य संकलन गर्ने लक्ष्य राखेको राजश्व अधिकृत राजु गुराँगाईंले जानकारी दिएका छन् ।
यस्तै चौविसे गाउँपालिकाले ५० लाख ५ हजार ८ सय ४० रुपैया राजश्व संकलन गरेको छ । योजना फाँट प्रमुख लिलाबहादुर कार्कीका अनुसार चालु आवमा ४५ लाख रुपैया राजश्व संकलन गर्ने लक्ष्य अनुरुप वडा कार्यालयलबाट वाटै कर तिर्ने व्यवस्था गरेको छ ।
सहिदभूमि गाउँपालिकाले ४३ लाख २० हजार रुपैया राजश्व संकलन गरेको छ । चालु आवमा ८३ लाख ६० हजार रुपैया राजश्व संकलन गर्ने गाउँपलिकाको लक्ष्य रहेको प्रमुख प्रशासकीय अधिकृत सुवर्ण घिमिरेले बताए ।
छथरजोरपाटी गाउँपालिकाले ४३ लाख रुपैया मात्रै संकलन गरेको छ । गाउँपालिकाले चालु आवमा ७५ लाख रुपैया राजश्व संकलन गर्ने लक्ष्य लिएको सूचना अधिकारी उपेन्द्रबहादुर श्रेष्ठले बताए ।
महालक्ष्मी नगरपालिकाले ४६ लाख ९९ हजार १ सय ७१ रुपैया राजश्व संकलन गरेको छ । चालु आवमा ६५ लाख रुपैया राजश्व संकलन गर्ने लक्ष्य लिएको लेखा अधिकृत दुर्गा घिमिरेले बताए ।
पाख्रीवास नगरपालिकाले ३४ लाख रुपैया मात्रै राजश्व संकलन भएको सूचना अधिकारी किरण राईले बताए । नगरपालिकाले चालु आवमा ८० लाख रुपैया राजश्व संकलन गर्ने लक्ष्य लिएको उनले जानकारी दिए ।
साँगुरीगढी गाउँपालिकाले ३३ लाख रुपैया राजश्व संकलन गरेको लेखापाल रोशन पोखरेलले बताए । चालु आवमा ६५ लाख राजश्व संकलन गर्ने लक्ष्य लिएको योजना फाँटका प्रमुख नारायण खनालले बताए ।
