आ न्दोलनरत मे डिकल कलेजका विद्यार्थीले आजबाट हुने परीक्षा ब हिष्कार गर्ने
काठमाडौं । लामो समयदेखि आन्दोलनरत मेडिकल कलेजका विद्यार्थीहरुले बुधबारबाट सञ्चालन हुने त्रिभुवन विश्वविद्यालयअन्तर्गत चिकित्साशास्त्र अध्ययन संस्थान (आइओएम) ले बुधबारदेखि सञ्चालन गर्ने एमबीबीएस, बीडीएसलगायत स्नातक तहका प्रथम वर्षको परीक्षा बहिष्कार गर्ने भएका छन् ।
मेडिकल कलेजहरूले अवैध रुपमा असुलेको शुल्क फिर्ताको माग गर्दै आएका विद्यार्थीहरुले भोलिबाट सञ्चालन हुने वार्षिक परीक्षा बहिष्कार गर्ने जनाएका हुन् । यसअघि गत कात्तिक २१ मा तोकेको परीक्षामा आफूहरुलाई परीक्षा दिन सक्ने वातावरण नभएकोभन्दै परीक्षा बहिष्कार गरेपछि आइओएमले १८ मंसिरका लागि परीक्षा सारेको थियो ।
स्नातक तह प्रथम वर्ष एमबीबीएसको परिक्षा नेशनल मेडिकल कलेज, चितवन मेडिकल कलेज र युनिभर्सल कलेज अफ मेडिकल साइन्सेसमा प्रथम वर्षमा अध्ययनरत विद्यार्थीले बहिष्कार गर्ने र बीडीएसतर्फको चितवन मेडिकल कलेज र युनिभर्सल कलेज अफ मेडिकल साइन्सेसका विद्यार्थीहरुले बहिस्कार गर्ने चिकित्सा संघर्ष समितिका महासचिव अनित सिन्हाले बताए ।
उनले गत मंसिर १० मा सरकार र निजी मेडिकल कलेज सञ्चालक बीचको सहमतिअनुसार एमबीबीएस र बीडीएस संकायअन्तर्गत पहिलो र दोस्रो वर्षमा अध्ययनरत विद्यार्थीको मात्रै शुल्क समायोजन हुने भएपछि आन्दोलनलाई निरन्तरता दिनु परेको बताए ।
सरकारसँगको दुई पटकको छलफलपछि निजी मेडिकल कलेज मन्त्रिपरिषद्बाट चिकित्सा शिक्षाको स्नातक तथा एमबीबीएस र बीडीएस कार्यक्रमका लागि निर्धारण गरिएको शुल्क कार्यान्वयन गर्न सहमत भए पनि त्यसले आन्दोलनरत विद्यार्थीको पीडाको सम्बोधन नभएको र सजिलै मेडिकल कलेज सञ्चालकहरू शुल्क समायोजन गर्न तयार पनि नहुने विद्यार्थीले बताएका छन् ।
सरकार र मेडिकल कलेज सञ्चालकहरूबीचको दुई बुँदे शुल्क समायोजन सहमति गरे पनि अहिलेसम्म कुनै कार्यान्वयन नगरेको आन्दोलनरत्त विद्यार्थीहरु बताउँछन् । राष्ट्रिय सतर्कता केन्द्रले मेडिकल कलेजहरूले विद्यार्थीबाट तीन अर्बभन्दा बढी ठगी गरेको प्रतिवेदन सार्वजनिक गरेको थियो । तर अहिलेसम्म विद्यार्थीको पक्षमा कुनै सुनुवाई भएको छैन् ।
आर्थिक वर्ष २०७४-२०७५, २०७५-२०७६ मा भर्ना भएका विद्यार्थीको शुल्क समायोजन अथवा फिर्ता गर्ने र २०७२-२०७३, २०७३-२०७४ मा भर्ना भएका विद्यार्थीको हकमा छानबिन गर्ने र उपयुक्त निर्णय लिन चिकित्सा शिक्षा आयोग समक्ष अनुरोध गर्ने लाचार निर्णय गरिएको छ । यसले हाम्रो माग सम्बोधन नभएको एक विद्यार्थीले बताए । -बाह्रखरीबाट
