पिङडाँडा कृषक समुहलाई १२ लाख बराबरको कृषि सामाग्री
नारायण कुमार राई/धनकुटा १९,असार । छथर जोरपाटी धनकुटाले मकै पकेट क्षेत्रलाई प्रवद्र्धनका लागि पिङडाँडा कृषक समुह,हात्तिखर्कलाई ५० प्रतिशत अनुदानमा सवा १२ लाख बराबरको कृषि सामाग्री हस्तान्तरण गरेको छ ।
पालिका अध्यक्ष शेरबहादुर लिम्बू र उपाध्यक्ष भीमकला श्रेष्ठ सहितको कृषि शाखाका प्रतिनीधिहरुले एक हस्तान्तरण कार्यक्रम गरेर उक्त सामाग्रीहरु समुहलाई हस्तान्तरण गरेको हो ।
पालिकाले यो बर्ष बिभिन्न वडाहरुलाई कृषि तथा पशुपालन पकेट क्षेत्र संगै वडा नं.१ हात्तिखर्क क्षेत्रलाई लाई मकै पकेट क्षेत्र घोषणा गरेको थियो ।
उक्त पकेट क्षेत्र मध्ये १ हजार ५ सय रोपनी मकै खेतीका लागि लक्षित गरेर उक्त समुहलाई कृषि सामाग्रीहरु उपलब्ध गराईएको पालिका कृषि शाखा अधिकृत मिलन कार्कीले जानकारी दिनुभयो ।
कार्कीका अनुसार समुहलाई १ लाख ८० हजार मूल्य बराबरको २ थान मिनी टिलर,१ लाख मूल्य बराबरको २ वटा क्रसर मिक्सचर(मिल) हस्तान्तरण गरिएको छ ।
त्यस्तै ३ लाख ५० हजार बराबरको सिंचाई पाईप,१ लाख बराबरको ८ थान डिजिटल काँटा,४८ हजार बराबरको १६ थान स्प्रेयर हस्तान्तरण गरिएको छ ।
फौजी किरा नियन्त्रणका लागि २ लाख बराबरको बिषादी,६० हजार बराबरको ६० थान कोदालो र यस अघि उक्त समुहलाई १ लाख बराबरको मकैको बीउ उपलब्ध गराईएको थियो ।
