जोखिमकै बिच धनकुटामा निषेधाज्ञा खुकुलो,चहल पहल समेत बढ्यो
धनकुटा,२६ असार । धनकुटामा १ सय ९८ जना कोरोनाका सक्रिय संक्रमित रहेका अबस्थामा निषेधाज्ञा खुकुलो बनाइए संगै चहल पहल समेत बढेको छ ।
कोरोना संक्रमणको जोखिम कायमै रहे पनि जिल्ला प्रशासन कार्यालय धनकुटाले आजबाट निशेधाज्ञा धेरै खुकुलो बनाए पछि बजारमा सर्वसाधारणको चहलपहल बढेको छ ।
आजै बाट धनकुटामा जोर विजोर नम्बरमा सार्वजनिक सवारी समेत चल्न थालेका छन् भने बजार पसल समेत पूर्णरुपमा संचालन आएका छन् । होटल, रेष्टुरा,साना चिया पसल पनि खुल्ला गरिएको छ ।
विद्यालय, हाटबजार, सिनेमाहल लगायतका भिडभाड हुने स्थान भने संचालन गर्न दिएको छैन् । खुला रहेने स्थानहरु समेत संचालन गर्दा पूर्ण रुपमा स्वाथ्य मापदण्डको पालना भने अनिवार्य गर्नु पर्ने भएको छ ।
कोरोना संक्रमणको जोखिमलाई कम गर्न भन्दै बैशाख २२ गते देखि धनकुटामा निशेधाज्ञा लगाईएको थियो । धनकुटामा अझै गाउँ घरमा समेत कोरोना संक्रमणको जोखिम भने कायमै रहेको छ ।-फाइल तस्बीर
