हिले खानेपानी तथा सरसफाई उपभोक्ता समितिको पुरानो कार्य समितिद्वारा सम्पूर्ण जिम्मेवारी नयाँ कार्य समितिलाई हस्तान्तरण
श्रावण २,धनकुटा । हिले खानेपानी तथा सरसफाई उपभोक्ता समितिको पुरानो कार्य समितिले सम्पूर्ण जिम्मेवारी नयाँ कार्य समितिलाई जिम्मा लगाएको छ ।
आज हिलेमा एक कार्यक्रमको आयोजना गरी पुरानो समितिका पदाधिकरीले नयाँ कार्य समितिका पदाधिकारीलाई लेखा सहित सम्पूर्ण जिम्मेवारी जिम्मा लगाएको हो ।
पूरानो कार्य समितिका कार्यवाहक अध्यक्ष हर्क लिम्वु,सचिव अमित ल्हो र कोषाध्यक्ष नारायण थापा लगायतले नयाँ कार्य समितिका अध्यक्ष एवम् धनकुटा नगरपालिका वडा नं १ का वडाध्यक्ष निरेन तामाङ,सचिव भोगेन्द्र थापा लगायतलाई जिम्मा लगाएको हो ।
खानेपानी उपभोक्ता समितिको नयाँ कार्य समिति अध्यक्ष निरेन तामाङको अध्यक्षतामा सञ्चालित कार्यक्रममा पूरानो कार्यसमितिको कार्यकालमा हिलेमा खानोपनी व्यवस्थापनका लागि गरिएका कार्यहरुको वारेमा जानकारी गराउदै समितिको नाममा हाल २ लाख ३८ हजार ६ सय ९१ रुपयाँ बैंक खातामा जम्मा रहेको जानकारी गराईएको छ ।
कार्यक्रममा उपभोक्ताहरुले समितिको हरहिसाव परदर्शी हुनु पर्छ । समितिमा एक राजनीतिक दलको मात्र पदाधिकारी तथा सदस्य हुनु हुदैन, खानेपानीका भएका मुहानहरुको संरक्षण गर्नुपर्छ भन्ने लगायतका सुझाव रखेका थिए ।
ती सुझावहरुलाई सम्वोधन गर्दै नवगठित समितिका अध्यक्ष तामाङले १ नं वडामा क्रियाशिल राजनीतिक दलको सिफारिसको आधारमा समितिमा सदस्य थप गर्ने,हरहिसाब पारदर्शी वनाउने,पूरानो हिसाब किताब उपभोक्ता माझ स्पष्ट पार्न छानविन समिति गठन गर्ने बताउनु भएको छ ।
कार्यक्रममा दिईएको जानकारी अनुसार हिलेमा जम्मा ९ सय ३१ घरधुरी खानेपानी उपभोक्ता छन् ।
