बल्ल किलिङमा बिजुली
फुङ्लिङ, ३० कात्तिक । बिजुली लाइन नभएपछि अँध्यारोमा बस्दै आएको ताप्लेजुङको दुर्गम हिमाली बस्ती किलिङमा बल्ल बिजुली बत्ती बलेको छ । मिक्वाखोला गाउँपालिका–५ पापुङमा रहेको घट्टेखोला लघु जलविद्युत् आयोजना सम्पन्न भएसँगै पहिलो पटक किलिङ गाउँ उज्यालो भएको हो । स्थानीयवासी रिङ शेर्पाले गाउँमा बिजुली बलेको बताउनुभयो ।
सो गाउँ जिल्लाको निकै नै दुर्गम मानिन्छ । स्थानीयवासीको सक्रियतामा १५ किलोवाट क्षमताको लघुजलविद्युत् आयोजना सम्पन्न भएको उहाँले जाकारी दिनुभयो । पापुङका वडाध्यक्ष डण्डु लामाले आयोजनाबाट गाउँका ७५ घरधुरी लाभान्वित भएको बताउनुभयो ।
हिमाली क्षेत्रका साथै ओसिलो भूभाग भएका कारण सौर्य ऊर्जा (सोलार बत्ती) प्रभावकारी नहुँदा हालसम्म टुकी बत्तीको उज्यालोमा निर्भर रहँदै आएका थिए ।
तत्कालीन संविधानसभा सदस्य पासाङ शेर्पाका उपस्थितिमा आयोजनाको शुभारम्भका अवसरमा स्थानीयवासीले भव्य नाचगान गरेर खुसियाली नै मानाएका थिए । आयोजना निर्माण भएपछि त्यहाँ रहेका नेपाली कागज उद्योग सञ्चालनमा पनि सहज भएको बताइएको छ । त्यस्तै विगतदेखि नै कुटानी–पिसानी मिल सञ्चालन गर्ने सोचमा रहेका किलिङवासीको सपना पनि पूरा हुने भएको वडाध्यक्ष लामाले बताउनुभयो । उक्त आयोजनाका लागि रु ९६ लाख र स्थानीयको श्रमदानसमेत लगानी भएको छ । लागतको कूल रकमध्ये वडा कार्यालयको अनुदान रु ४९ लाख, नाम्सालिङ सामुदायिक विकास केन्द्र (एनसिडिसी) इलामको २२ लाख, मध्यमेवा हाइड्रोपावरको सामाजिक उत्तरदायित्व विकास कोषबाट रु १५ लाख रहेको छ ।
शिक्षा र स्वास्थ्यमा लगानी बढाउन माग
काठमाडौँ, ३० कात्तिक। त्रिभुवन विश्वविद्यालयका पूर्वउपकुलपति प्रा शङ्करराज पाठकले राष्ट्र निर्माणका लागि राज्यले शिक्षा र स्वास्थ्यमा लगानी बढाउनुपर्नेमा जोड दिनुभएको छ । सरस्वती बहुमुखी क्याम्पस, रिसर्च मेनेजमेन्ट सेलद्वारा प्रकाशित जर्नल ‘इन्टरडिसिप्लिनरी जर्नल अफ मेनेजमेन्ट एन्ड सोसल साइन्सेस’को यहाँ विमोचन गर्दै उहाँले शैक्षिक थलोमा प्राध्यापक, शिक्षक, कर्मचारी, विद्यार्थीले राजनीतिक विचारको प्रवेश गराउन नहुने बताउनुभयो । सोही क्याम्पसका पहिलो प्रिन्सिपलका रुपमा समेत कार्य गर्नुभएका उहाँले शिक्षक वा विद्यार्थीले सफलता प्राप्तिका लागि आफैँभित्र प्रतिस्पर्धा गर्न सुझाव दिनुभयो । क्याम्पस प्रमुख डा गोलमान गुरुङले क्याम्पसबाट लाखौँ विद्यार्थीले गुणस्तरीय शिक्षा प्राप्त गरिसकेको उल्लेख गर्दै भन्नुभयो, “पठनपाठनमा वैचारिक कुरा ल्याउन हुँदैन ।”
कार्यक्रममा सहायक क्याम्पसप्रमुख ईरा श्रेष्ठ, प्रा डा षडानन्द पौडेल, प्राध्यापक सङ्घ एकाइ उपसभापति डा कल्पना लुइँटेल, आरएमसी प्रमुख यादवमणि उपाध्याय, अनुसन्धानकर्ता मुक्ति रिजालले अन्तर्राष्ट्रिय स्तरको यस जर्नलले निरन्तरता पाओस् भनी शुभकामना दिनुभयो ।ओपन एसेस–ब्लाइन्ड रिभ्यू जर्नलका रुपमा रहेको अद्र्धवार्षिक ‘इन्टरडिसिप्लिनरी जर्नल अफ मेनेजमेन्ट एन्ड सोसल साइन्सेस’ प्रिन्ट र अनलाइन दुवै स्वरुपमा उपलब्ध छ । जर्नलको प्रधान सम्पादकमा डा रामहरि शर्मा लम्साल तथा सम्पादकद्वयमा जमुना श्रेष्ठ र गणेशदत्त पन्त हुनुहुन्छ । जर्नलमा विभिन्न १८ अनुसन्धानमूलक लेख प्रकाशित छन् । विसं २०१६ मा स्थापित सो क्याम्पसमा मानविकी र व्यवस्थापन सङ्कायका स्नातक÷स्नातकोत्तर कार्यक्रम बिहानी, दिवा र रात्रि सत्रमा सञ्चालित छन् ।
