धनकुटाको पाख्रीबास नगरपालिकामा नेकपा एमालेबाट प्रमुखमा राई र उपप्रमुखमा देउजा उम्मेदवार ! को हुन् राई र देउजा ?
धनकुटा । वैशाख ३० गते हुन गइरहेको आसन्न स्थानिय तह निर्वाचनका लागि धनकुटाको पाख्रीबास नगरपालिकाको लागि नेकपा एमालेले नगरप्रमुख,उपप्रमुखका लागि सर्वसम्मत प्रत्यासीको टुंगो लगाएको छ ।
नगर प्रमुख ( मेयर ) पदको लागि भीम बहादुर राई र उपप्रमुख(उपमेयर) मा नम्रता देउजा चयन हुनुभएको छ ।
को हुन् राई र देउजा ?
नगर प्रमुख प्रत्यासी राईको जन्म वि.स २०१८ मा तत्कालीन फलाटे गाविसमा भएको थियो । अत्यन्तै शालिन , भद्र र निष्ठावान राई पाख्रिबास एमालेका सर्वाधिक लोकप्रिय नेता हुनुहुन्छ । नेपालमा भएको पहिलो जनआन्दोलन २०४६ सँगै उहाँ सक्रिय राजनीतिमा क्रियाशील हुनुहुन्छ ।
उहाँले वि.स. २०३५ मा एसएलसी उत्तिर्ण गरि २०५० मा स्नातक तह उतिर्ण गर्दै स्नातकोत्तर सम्म अध्ययन गर्नुभएको छ । वि. स २०४१ बाट भोजपुरको ठुलोदुङमाबाट अध्यापन कार्यमा संलग्न राईले त्यहाँ एक वर्ष शिक्षणमा संलग्न हुनुभयो । त्यसपश्चात उहाँ गृह जिल्ला धनकुटाको तत्कालीन फलाटे गाविस अन्तर्गत नै शिक्षक भएर काम गर्नु भयो । वहां वि .स. २०४६ सालमा निम्म माध्यमिक तहमा स्थाई हुनुभयो ।
वि. स. २०५४ सालमा भएको आम निर्वाचनमा उहाँ स्थाई शिक्षकबाट राजिनामा दिई नेकपा एमालेबाट तत्कालिन फलाटे गाविसमा निर्वाचित हुनुभयो । तत्पश्चात उहाँ विभिन्न जिम्मेवारीमा रहि आफ्नो कार्यकौशलता मार्फत एक इमानदार र बफादार व्यक्तित्वका रुपमा परिचित हुनुहुन्छ ।
वि. स. २०७१ सालमा सुकुम्वासी समस्या समाधान आयोग धनकुटाको अध्यक्ष भई काम गरिसक्नुभएका राई अध्ययनशील र अनुभवी व्यक्तित्वका रुपमा समग्र धनकुटामा चर्चाको शिखरमा हुनुहुन्छ ।
उहाँले विभिन्न देशहरुको भ्रमण समेत गरिसक्नुभएको छ ।
-कृषि भ्रमण को रुपमा १ हप्ते भारत भ्रमण ।
-कृषि भ्रमणकै रुपमा एक हप्ते थाइल्यान्ड भ्रमण ।
-१२ दिने चीनको राजनीतिक भ्रमण । ( झलनाथ खनालको नेतृत्वमा )
राई स्थानीय स्तरदेखि नै आफ्नो व्यक्तिगत जीवनलाई पार्टी जीवनमा समर्पण गर्दै आउनुभएको छ । उतिबेला फलाटे गाविसको गाउँ कमिटि अध्यक्ष , गाउँ कमिटी सचिब हुँदै वि .स. २०५३ सालबाट हालसम्म निरन्तर जिल्ला कमिटिमा आबद्द रहि आफ्नो गौरवपूर्ण इतिहास निर्माण गर्दै एक कुशल वक्ता , नेतृत्वदायी क्षमता भएका, नवीन विचारक र समाजलाई चलायमान बनाउदै नयाँ आयाम दिन सक्ने , दुरदर्शी र समाज बदल्न सक्षम एमाले नेताका रुपमा जनतामाझ लोकप्रिय हुनुहुन्छ ।
नगर उपप्रमुखका प्रत्यासी नम्रता देउजा पाख्रीबास नगरकार्यपालिका सदस्य हुनुहुन्छ । लामो समय देखि एमालेको सक्रिय राजनीतिमा क्रियाशील उहाँ हाल धनकुटा जिल्ला कमिटी सदस्य समेत हुनुहुन्छ ।
त्यसैगरि एमालेले पाख्रीबास नपा वडा नं ३ बाट वडा अध्यक्ष र सदस्यहरुको लागि पनि सबै उम्मेदवार सर्वसम्मत रुपमा टुंगो लगाएको छ । जसमा अध्यक्षमा सरोज राई र सदस्यहरुमा चन्द्र आले मगर ,निर्मला वि.क.,सीता बस्नेत र यशोदा तामाङ रहेका छन् ।
अन्य वडाहरुमा आज बेलुका सम्म उम्मेदवारको टुंगो लाग्ने श्रोतले जनाएको छ ।
