साँगुरीगढी गाउँपालिकाद्वारा प्राथमिक स्वास्थ्य केन्द्र डाँडाबजारलाई एम्वुलेन्स हस्तान्तरण
धनकुटा,१९ मंसिर । धनकुटाको साँगुरीगढी गाउँपालिकाले प्राथमिक स्वास्थ्य केन्द्र डाँडाबजारलाई एम्वुलेन्स हस्तान्तरण गरेको छ ।
आइतवार आयोजित एक कार्यक्रमका वीच साँगुरीगढी गाउँपालिका अध्यक्ष जितेन्द्र राईले एम्वुलेन्सको चावी साँगुरीगढी गाउँपालिका वडा नं. ५ का वडाध्यक्ष तथा स्थानीय स्वास्थ्य समन्वय समितिका अध्यक्ष खड्क लिम्बुलाई हस्तान्तरण गर्नु भयो ।
हस्तान्तरण कार्यक्रममा वोल्दै गाउँपालिका अध्यक्ष राईले पालिकाभरिका नागरिकलाई उपचारका लागि स्वास्थ्य संस्था आइपुग्न सहज होस् भन्ने उद्देश्यले एम्वुलेन्स खरिद गरि स्वास्थ्य चौकीलाई प्रदान गरिएको बताए ।
उनका अनुसार एम्वुलेन्स नहुँदा विरामीलाई उपचारका लागि स्वास्थ्य संस्था आइपुग्न कठिन थियो । कतिपय विरामीहरु घरमै वस्नु पर्ने वाध्यता थियो तर ती सबै वाध्यता हटेर एम्वुलेन्सबाट स्वास्थ्य संस्था छिटो पुगेर सहज उपचार पाउने उनले दावी गरे ।
यो पनि…
मध्यमोदी जलविद्युत् आयोजनामा परीक्षण उत्पादन सुरु
पर्वत, १९ मङ्सिर (रासस) :मोदी खोलामा निर्माणाधीन १८ मेगावाट क्षमताको मध्यमोदी जलविद्युत् आयोजनाको निर्माण पूरा भएको छ । आयोजनाको सम्पूर्ण काम पूरा भएर परीक्षण उत्पादनको तयारी सुरु गरिएको हो ।
मिडिल मोदी हाइड्रोपावर लिमिटेडले विसं २०७१ को मङ्सिरमा सुरु गरेको आयोजना आठ वर्षको अवधिमा सम्पन्न भएको हो । करिब रु चार अर्बको लगानीमा निर्माण भएको आयोजनाबाट आजदेखि परीक्षण उत्पादन सुरु गरिएको आयोजना प्रमुख प्रताप खरेलले जानकारी दिनुभयो । नेपाल विद्युत् प्राधिकरणको टोलीले परीक्षण उत्पादन र प्रसारण लाइनमा जडान गर्ने कार्यको अध्ययन गरिरहेको खरेलले जानकारी दिनुभयो ।
निर्माण थालेको तीन वर्षमा नै काम पूरा गर्ने लक्ष्य राखिए पनि भूकम्प, नाकाबन्दी र कोभिड–१९ को असरका कारण आयोजना पाँच वर्षपछि धकेलिएको हो । आयोजना प्रमुख खरेलका अनुसार परीक्षण उत्पादन सुरु गरेपछि उत्पादित विद्युत् एक सय ३२ केभी क्षमताको मोदी–लेखनाथ सबस्टेसनमा जडान गर्ने तयारी भइरहेको छ । चौध दिनसम्मको परीक्षणपछि मात्र केन्द्रीय प्रसारण लाइनमा जोडिने भएको छ ।
आयोजनाको ड्याम, टनेल, पावर हाउस, टावर निर्माणलाई आयोजनाका प्रमुख र जटिल कामका रूपमा लिने गरिन्छ ती सबै काम पूरा भएका छन् । प्रसारण लाइनसमेतको निर्माण सकिएपछि परीक्षण उत्पादन थालिएको खरेलले बताउनुभयो ।
सुरुआतमा रु दुई अर्ब ८० करोड लागत लाग्ने अनुमान गरिएको आयोजनाको निर्माण चौधरी ग्रुपले गरेको हो । विसं २०७१ मा ग्रुपका अध्यक्ष विनोद चौधरीले आयोजनाको शिलान्यास गर्नुभएको थियो । तीन वर्षमा नै निर्माणको काम सकेर २०७४ मङ्सिरमा काम पूरा गर्ने लक्ष्य राखिएको भए पनि प्रभावित क्षेत्रका नागरिकको पटकपटकको आन्दोलन र विरोध तथा प्राकृतिक विपद्का कारण आयोजनाको काम लम्बिएको आयोजना प्रमुख खरेलले जानकारी दिनुभयो । त्यसका कारण लागतसमेत ह्वात्तै बढेको छ ।
विसं २०७२ मा भूकम्पको मारमा परेको आयोजनाले बाढी र पहिराको पनि उस्तै सामना गर्नुपरेको थियो । पछिल्लो एक वर्षयता आयोजना निर्माण कार्यमा कुनै पनि पक्षबाट विरोध नभएका कारण कामले तीव्रता पाएको थियो ।
पर्वतको मोदी गाउँपालिका–२ केङ्गामा पावर हाउस राखिएको आयोजनाको बाँध भने कास्कीको अन्नपूर्ण गाउँपालिका–३ वीरेठाँटीमा रहेको छ । आयोजनाको दुई हजार तीन सय ९३ मिटर लामो सुरुङमा मोदी खोलाको पानी ल्याइनेछ । निर्माण सुरु गर्ने बेलामा १५ दशमलव एक मेगावाट क्षमतामा आयोजना सञ्चालन गर्ने भनिएको भए पनि निर्माण कार्य सँगसँगै क्षमता बढेर १८ मेगावाटमा पुगेको छ ।
