धनकुटा महोत्सव आज सकिदै, समापन कार्यक्रम दिउँसो हुने
धनकुटा,१६ माघ । धनकुटा माघ ६ गते देखि सुरु भएको प्रादेशिक औद्योगिक व्यापारमेला कृषि प्रदर्शनी, एभोकाडो तथा ५ औं धनकुटा महोत्सव आज सकिदैछ । माघ ६ गते बाट सुरु भएको मेला औपचारीक रुपमा सकिन लागेको हो ।
धनकुटा सहित प्रदेश न १ कै शिक्षा, कृषि, पर्यटन, व्यापार सहित साँस्कृतीक क्षेत्रको प्रचार प्रशारका लागि महोत्सव आयोजना गरिएको थियो । महोत्सव सकिन २ दिन बाँकी रहदाँ महोत्सव स्थलमा प्रवेश गर्ने क्रममा ठेलमठेल हुदाँ ३० जना घाइते भएका थिए । महोत्सव केहि दिनथप गरिने भनिएको थियो तर १४ गतेको घटना पछि आयोजकले निर्धारीत समयमा नै महोत्सव सम्पन्न गर्न लागेको आयोजक समिती धनकुटा उद्योग वाणिज्य संघका अध्यक्ष बिजयसन्तोषी राईले जानकारी दिए ।
आज दिउँसो समापन कार्यक्रम गरिदै छ ।
यो पनि…
हिमपातले सेताम्य राराताल क्षेत्र
मुगु, १६ माघ (रासस) ःगत मङ्गलबार बिहानैदेखि कर्णालीका उच्च भेगमा हिमपात हुन थालेको छ । राराताल क्षेत्रमा हिमपात हुँदा ताल झनै आकर्षक बनेको छ ।
आकर्षक पर्यटकीय गन्तव्य रहेको सो क्षेत्रमा भएको हिमपातले यहाँको दृश्य निकै मनमोहन बनेको छ । त्यहाँ पुगेर हिउँ खेल्न आन्तरिक तथा बाह्य पर्यटकको घुइचो लागेको छ । चिसोको प्रवाह नगरी रारा जाने क्रम जारी छ । रारा वरपर दुई फिटसम्म हिउँ जमेको छ । यस वरिपरिका रुखर बिरुवाहरु हिउँले फुलेका छन् ।
रारा क्षेत्रवरपर जताततै सेताम्य देखिन्छ । भारी हिमपात भएपछि तालको छेउमा सेतो सिरक राखेजस्तै देखिन्छ । राराले खैरो, बैजनी र नीलो गरी दिनमै तीन पटकसम्म आफ्नो रुप बदल्दा सेतो हिउँले यसमा झनै आकर्षण थपेको छ ।
जाडो समयमा रारा हेर्न आएका आन्तरिक पर्यटक राम शाहले राराको यस सिजनको दृश्य भाग्यमानीलाई मात्र हेर्न अवसर जुर्ने प्रतिक्रिया दिनुभयो । मुर्मा टपसम्म पुगेर सेताम्मे रारादेखि वारिपारिको बस्तीको दृश्यावलोकन गर्न सकिने भएकाले यो मौसम रारा भ्रमणका लागि उपयुक्त हुने पर्यटकको भनाइ छ । रारा क्षेत्रफलका पाँच किलोमिटर लम्बाइ, करिब तीन किलोमिटर मिटर चौडाइ र १६७ मिटर गहिराइ रहेको छ ।
रारामा विश्वमा दुर्लभ असला जातका माछा, रानी ट्राउट भ्यागुतो र तीन सय प्रजातिका चरा पाइन्छन् । कस्तुरी, रेडपाण्डा, मृग, घोरल, भालु, रतुवालगायत वन्यजन्तु अवलोकनका लागि रारा क्षेत्र महत्वपूर्ण मानिँदै आएको रारा राष्ट्रिय निकुञ्जको कार्यालयले जनाएको छ ।
