ओली भन्छन् -३३ किलो सुन पत्ता लगाउन सकिएन तर गायब पार्नेलाई कारवाही गर्यौं
नेकपा एमालेका अध्यक्ष केपी शर्मा ओलीले ३३ किलो सुन नभेटिए पनि गायब पार्नेमाथि आफू नेतृत्वको सरकारले कारवाही गरेको दाबी गरेका छन् ।
आइतवार पार्टी केन्द्रीय कार्यालय च्यासलमा आयोजित पत्रकार सम्मेलनमा ओलीले आफूभन्दा अगाडिको सरकारको पालामा ३३ किलो सुन आए पनि खोज्दा नभेटिएको तर संलग्नलाई कारवाही गरेको विरोधाभास टिप्पणी गरेका हुन् ।
‘३३ किलो सुन हाम्रो सरकार बन्नुभन्दा अगाडि आएको थियो । अनेक सुन आउने र जाने भइरहेको रहेछ । छानबिन समिति बनाउँदा सुन भेटिएन । तर छानबिन समिति बनाएर कारवाही गरियो । अहिले पनि जेलमा छन्’ ओलीले भने, ‘यसमा संलग्नमाथि कारवाही गरियो । सुन त बाहिर पठाइसकिएको थियो । गायब थियो । तर पत्ता लगाउन सकिएन । लुकेको कुरा थाहा पाएपछि कानूनी दायरामा ल्याएर कठघरामा उभ्यायौं ।’
कडाइका साथ छानबिन गर्दा पनि सुन नभेटिएको अोलीले स्वीकार गरे । आवश्यक परे फेरि पनि त्यो काण्डमा सरकारले छानबिन गर्न सक्ने बताए ।
यस्तै ओलीले एक सय किलो सुन काण्डबारे उच्चस्तरीय स्वतन्त्र छानबिन समिति बनाउनुको विकल्प नभएको पनि बताए ।
