जब बुवाले बिरामी छोराका लागि सबवेमा खाना मागे…
काठमाडौं । चीनमा एक बुवाले उपचार गरेर फर्किंदा दिनभर भोकै रहेको आफ्नो १६ वर्षीय छोराका लागि सबवे यात्रुबाट खाना मागेको भिडियोले अहिले चर्चा पाएको छ ।
अगस्ट १४ मा पूर्वी चीनको आन्हुई प्रान्तको हेफेईको ‘सबवे’मा खिचिएको भिडियोमा बुवाले यात्रुहरूलाई सेरेब्रल पाल्सी (मस्तिष्क पक्षाघात) भएको र दिनभर केही नखाएका छोराका लागि खानेकुरा मागेको देखिन्छ ।
नाम नखुलाइएका ती बुवाले सिटी स्क्यान तस्बिरसहितको सेतो प्लास्टिकको झोला समात्दै यात्रुहरूलाई आफूहरू दिनभर अस्पतालमा भएको र केही खाने मौका नपाएका भनेका थिए । ती बुवाले छोरा आफैँ दिसापिसाब गर्न नसक्ने र आफैँले खुवाउनुपर्ने पनि भनेका छन् ।
त्यसपछि नजिकै उभिएकी एउटा महिलाले आफ्नो झोलाबाट अंगुरको गुच्छा निकालेर दिएको भिडियोमा देखिन्छ ।
त्यसपछि धन्यवाद दिँदै ती बुवाले आफ्नो छोरालाई अंगुर खुवाएको भिडियाले चिनियाँ सामाजिक सञ्जालमा लाखौँले हेरेका छन् । सबैले बुवालाई सम्मान गर्दै उनको स्वास्थ्य सुधारको कामना गरेका छन् ।
