अमेरिकी राष्ट्रपति जो बाइडनका छोरा हन्टरविरुद्ध फौजदारी मुद्दा दर्ता
एजेन्सी । अमेरिकी राष्ट्रपति जो बाइडनका छोरा हन्टर बाइडनविरुद्ध फौजदारी मुद्दा दर्ता भएको छ । बन्दुक खरिद गर्दा आफू लागुऔषध दुर्व्यसनी रहेको कुरा ढाँटेको अभियोगमा उनीविरुद्द फौजदारी मुद्दा दर्ता गरिएको हो ।
अमेरिकामा बहालवाला राष्ट्रपतिका छोरा विरुद्ध फौजदारी मुद्दा दायर गरिएको यो पहिलो घटना हो ।
बाइडनको गृहराज्य डेलावेयरस्थित जिल्ला अदालतमा दायर गरिएको उक्त मुद्दामा दोषी ठहर भए ५३ वर्षीय हन्टरलाई अधिकतम् २५ वर्षसम्मको जेल सजाय हुनसक्ने अन्तर्राष्ट्रिय सञ्चारमाध्यमले उल्लेख गरेका छन् ।
अमेरिकी कानुनअनुसार कुनै पनि प्रकारको लागुऔषध दुर्व्यसनमा रहेका व्यक्तिले बन्दुक किन्न र राख्न पाउँदैनन् । हन्टर बाइडनले सन् २०१८ को अक्टोबरमा डेलावेयरको बन्दुक पसलबाट कोल्ट कोब्रा स्पेशल रिभोल्भर खरिद गर्दा आफू कुनै लागुऔषधको दुव्यर्सनी नरहेको झुटो दाबी पेस गरेको अभियोगपत्रमा उल्लेख गरिएको छ । उनी विरुद्ध तीनवटा आरोप लगाइएकोछ । सो समयमा हन्टर बाइडन क्रयाक कोकिनका दुव्यर्सनी थिए ।
बाइडन अदालतमा कहिले उपस्थित हुने छन् भन्ने अझै स्पष्ट नरहेको समाचारमा जनाइएको छ । हन्टर विरुद्ध कर छली सम्बन्धी अर्को अनुसन्धान पनि जारी छ ।
बन्दुक तथा कर सम्बन्धी दुवै विषयको समाधान गर्न सरकारी अभियोजनकर्ता र हन्टरका कानुन व्यवसायीबीच गत जुनमा एउटा सहमति भएको थियो । सो सहमति अन्तर्गत बाइडनले समयमा कर नतिरेको सम्बन्धी दुई अभियोगमा आफनो दोष स्वीकार गर्ने र लागु औषध उपचारसम्बन्धी कार्यक्रममा संलग्न भएर अवैध बन्दुक सम्बन्धी फौजदारी अभियोगबाट मुक्ति पाउने चांजोपांजो मिलाइएको थियो । तर अन्तिम समयमा आएर अदालतले अनुमति नदिँदा नाटकीय रुपमा उक्त सम्झौता तुहिएको थियो ।
दोस्रो कार्यकालका लागि प्रतिस्पर्धा गर्ने घोषणा गरेका ८० वर्षीय राष्ट्रपति जो बाइडनका लागि छोराको यो मुद्दाले राजनीतिक क्षति पुर्याउन सक्ने अनुमान गरिएको छ ।
