ताप्लेजुङको आङखोपमा पहिरोले घर पुरिँदा पाँच जना घाइते
ताप्लेजुङ । ताप्लेजुङको सिदिङबा गाउँपालिकाको आङखोपमा पहिरोले घर पुरिँदा पाँच जना घाइते भएका छन् ।
स्थानीय हस्त बहादुर कटुवालको घर पहिरोले पुरिँदा ५० वर्षीया श्रीमती ठगमाया कटुवाल गम्भिर घाईते हुनु भएका हुन् भने अन्य चार जनाको अवस्था सामान्य रहेको छ ।
कुलोमा बगेको पानी छेकिएर घरमाथिको खेतमा पस्दा पहिरो खसेर घर पुरिएर परिवारका अन्य चार जना घाइते भएको आङखोपका वडाध्यक्ष रत्न बहादुर खत्रीले जानकारी दिनुभयो । उहाँका अनुसार गएराति करिब १ बजेको समयमा पहिरोले घर पुरिएको हो । पहिरोले एक्कासी घर पुरिएपछि छेउमा रहेको मतानमा सुतेका छोराबुहारीले आमाबुवाको तत्काल उद्धार गरेका थिए । पहिरोका कारण हस्तबहादुर सहित पाँच जना सामान्य घाइते भएका छन् । घरमा तथा मतानमा सुतेका छोरा जगत कटुवाल, बुहारी सरस्वता कटुवाल र छोरी सम्झाना कटुवाल सामान्य घाइते भएको बताइएको छ ।
घाईते ठगमायालाई गम्भिर चोट लागेकाले थप उपचारको लागि एम्बुलेन्स झिकाइएको वडाध्यक्ष खत्रीले बताउनुभयो । घटना भएको करिब ७ घण्टा बितिसक्दा समेत एम्बुलेन्स आइनपुगेको स्थानीय मौसम सेलिङ लिम्बूले बताउनुभयो । उहाँका अनुसार पालिकाको केन्द्र साब्लाखुबाट एम्बुलेन्स झिकाइएको छ । साब्लाखुबाट घटनास्थल पुग्न आधा घण्टाको मात्रै समय लाग्नेभएपनि हालसम्म घाईतेको उद्धार हुन सकेको छैन ।
राति वर्षा नभएपनि सिँचाइका लागि ल्याइएको कुलो थुनिएर पानी खेतबारीमा खसेर पहिरो झरेको स्थानीयको भनाइ छ । घटनास्थलमा अहिले साब्लाखु प्रहरी चौकीको टोलीले अनुसन्धान तथा क्षतिको विवरण सङ्कलन गर्ने कार्य सुरु गरेको छ ।-रेडियो आठराई
