प्रधानमन्त्री ओली आज सुख्खाग्रस्त मधेस आउँदै
इन्दीप कोइराला, बारा । प्रधानमन्त्री केपी शर्मा ओली आज सुख्खाग्रस्त मधेसका महोत्तरी र बारा जिल्लाको भ्रमणमा आउदै छन ।
प्रधानमन्त्री ओली विहान १०ः३० बजे काठमाडौंबाट महोत्तरी जिल्लाको मटिहानी नगरपालिकातर्फ प्रस्थान गर्ने कार्यक्रम रहेको प्रधानमन्त्री कार्यालयले जनाएको छ ।
प्रधानमन्त्री ओलीले ११ः३० बजे मटिहानी नगरपालिकास्थित विग्ही नदीमा निर्माण सम्पन्न भएको पुलको उद्घाटन गर्ने छन । सो कार्यक्रममा भौतिक पूर्वाधार तथा यातायात मन्त्री देवेन्द्र दाहाल पनि विशिष्ट अतिथिका रूपमा सहभागी हुनेछन ।
मटिहानीमै निर्माण भएको प्रसूति गृहको उद्घाटन पश्चात प्रधानमन्त्रीले मध्यान्ह १२ बजे आयोजित सभालाई सम्बोधन गर्ने कार्यक्रम पनि तय गरिएको छ ।
प्रधानमन्त्री ओलीको मधेस भ्रमणको अर्को चरणमा जनकपुर–कुर्था–सम्सी सडकखण्ड अन्तर्गतको रौजास्थित रातुखोला पुलको उद्घाटन दिउँसो १ः४० बजे गरिनेछ । त्यसपश्चात दिउँसो २ बजे बाराको परवानीपुर गाउँपालिकाको नव निर्मित प्रशासकीय भवन उद्घाटन गरी त्यहाँ आयोजित सभालाई प्रधानमन्त्रीले सम्बोधन गर्नेछन ।
प्रधानमन्त्रीको आजको कार्यक्रम काठमाडौं फर्किएर दिउँसो ३ बजे सम्पन्न हुने छ ।
मधेस क्षेत्रमा लगातारको वर्षा अभाव र सिंचाइको सीमितताका कारण उत्पन्न भएको खडेरी तथा सुख्खाको अवस्थाको स्थलगत निरीक्षण र किसानसँग प्रत्यक्ष संवाद गर्ने उद्देश्यले प्रधानमन्त्री ओली मधेस जाँदै छन ।
प्रधानमन्त्री ओलीले सामाजिक सञ्जालमार्फत भनेका छन,‘साउनको पहिलो सातासम्म पनि धान रोपाइँ हुन सकेको छैन। त्यहाँका वस्तुस्थिति हेरौं र स्थानीय किसानका कुरा सुनौं भन्ने लागेको छ। आज महोत्तरी र बाराका दिदीबहिनी दाजुभाइहरूसँग भेट हुने छ।’
