२३ बर्षपछि धनकुटाकी पदम मायालाई क्षतिपूर्ति
नारायण कुमार राई/धनकुटा,९ मंसिर । फैसलामा तोकिए भन्दा बढी कैदमा राखिएकी धनकुटाकी पदममाया गुरुङलाई कैद मुक्त भएको दुई दशक पछि नेपाल सरकारले क्षतिपूर्ति दिएको छ ।
चौबिसे गाउँपालिका वडा नं.१ छ नं.बुधबारे निवासी ५७ बर्षिया गुरुङलाई तोकिएको भन्दा ५ बर्ष ६ महिना बढी कैदमा राखे बापत नगद ६ लाख ३ हजार रकम क्षतिपूर्ति दिएको हो ।
उहाँलाई शोमबार गृह मन्त्रालयले धनकुटाका प्रमुख ज्रिल्ला अधिकारी बिनोद कुमार खड्का मार्फत् चौबिसे गाउँपालिकाका अध्यक्ष र जिल्ला प्रहरी कार्यालयका प्रमुखको रोहबरमा जिल्ला प्रशासन कार्यालय धनकुटामा उक्त रकम हस्तान्तरण गरेको हो ।
हस्तान्तरण पछि गाउँपालिकाका अध्यक्ष राजकुमार चेम्जोङले यस क्षतिपूर्तिले ‘राज्यले पनि गल्ति गरेपछि नागरिक प्रति उत्तरदायी हुनुपर्छ’ भन्ने कानूनी राज्यको प्रत्याभूति दिलाएको प्रतिक्रिया दिनुभयो ।
बि.सं.२०४८ सालमा जबरजस्ती करणीबाट जन्मिएकी शिसु हत्या कसुरमा गुरुङलाई धनकुटा जिल्ला अदालत र पुनराबेदनले २० बर्ष सजाय फैसला गरेपनि सर्बाेच्च अदालतले ५ बर्ष कैद तोकेको थियो ।
जस अनुरुप बि.सं.२०५३ साल पौसमा कैदमुक्त हुनुपर्ने उनलाई राज्यले २०५९ साल असारमा मात्र जेल मुक्त गरिएको थियो । यस बिषयलाई कानुन ब्यबसायी निरञ्जन उप्रेतीले उनको क्षतिपूर्तिको माग गर्दै राज्य बिरुद्ध सर्बोच्चमा रिट दायर गर्नुभएको थियो ।
रिट उपर बि.सं.२०७४ सालमा सबोच्च अदालतले पिंडित गुरुङको पक्षमा फैसला सुनाएको थियो । तर क्षतिपूति सम्बिन्धि कानुनको अभाव भएकाले गृह मन्त्रालयको पहल र मन्त्री परिषदको निर्णयबाट उहाँलाई क्षतिपूर्ति दिलाउन सम्भव भएको मन्त्रालयकी शाखा अिधिकृत समिता पोखरेलले जानकारी दिनुभयो ।
