वरिष्ठ पत्रकार लम्साल सहित दुईजना सम्मानित
विराटनगर । बालागुरु षडानन्द अधिकारीको १ सय ९१ औं जन्मजन्यतीका अवसरमा वरिष्ठ साहित्यकार एवं पत्रकार कृष्णविनोद लम्सालसहित दुईजनालाई सम्मान गरिएको छ ।
आबाल ब्रम्हाचारी बालागुरु षडानन्द प्रतिष्ठान, विराटनगरले मंगलबार विराटनगरमा आयोजना गरेको कार्यक्रममा लम्सालसहित समाजसेवी खेशरबहादर बस्नेतलाई सम्मान गरिएको हो । लम्साललाई राजेन्द्रप्रसाद चापागाईंले स्थापना गरेको १४ हजार १ सय राशिको नगद पुरस्कारसहित सम्मान गरिएको थियो । ५ दशकभन्दा लामो समयदेखि साहित्य र पत्रकारितामा सक्रिय लम्साल नेपाल पत्रकार महासंघ सुनसरीका पूर्वअध्यक्षसमेत हुन् ।
लम्साल र बस्नेतलाई कार्यक्रमका प्रमुख अतिथिसमेत रहेका विराटनगर महानगरपालिकाका मेयर नागेश कोइराला, आयोजक संस्थाका अध्यक्ष कोमलकृष्ण अधिकारीले दोसल्ला ओढाएर सम्मानपत्र प्रदान गरेका थिए ।
प्रतिष्ठानले हरेक वर्ष समाजका विभिन्न क्षेत्रमा योगदान पु¥याउने व्यक्तिहरूलाई सम्मान गर्दै आएको छ ।
कार्यक्रमलाई सम्बोधन गर्दै मेयर कोइरालाले नेपालको शिक्षा र समाज सुधारमा बालागुरु षडानन्दको योगदान अतुलनीय रहेको चर्चा गरे । उनले उनको जीवनबाट समाजले पाठ सिक्नुपर्नेमा जोड दिए । ‘बालागुरु षडानन्दका बारेमा धेरै किवदंन्तीहरू रहेका छन् । उहाँ रुमाल ओछ्याएर अरुण नदी तर्नुहुन्थ्यो रे, गर्मीमा आगो तापेर र जाडोमा चिसो ढुंगामा बसेर तपस्या गर्नुहुन्थ्यो भन्ने कुरा हामीले विभिन्न ग्रन्थमा पढेका छौं । यस हिसाबले बालागुरु एक चमत्कारी व्यक्ति हुनुहुन्थ्यो भन्ने मलाई लाग्दछ,’ कोइरालाले भने, ‘यससँगै शिक्षाको विकास, समाज सुधार, धर्मसंस्कृतिको रक्षा, जातीय विभेदविरुद्धको अभियानमा समेत बालागुरुको महत्वपूर्ण योगदान रहेको छ ।’
अहिले समाजसेवाका नाममा व्यापार भइरहेको बताउँदै मेयर कोइरालाले बालागुरुबाट समाजसेवा गर्नेहरूले पाठ सिक्नु जरुरी रहेको उल्लेख गरे । हाटबजार र गुठीको व्यवस्थासमेत बालागुरु षडानन्दले नै सुरुवात उनको भनाइ थियो ।
आयोजक संस्थाका अध्यक्ष कोमलकृष्ण अधिकारीको अध्यक्षतामा भएको कार्यक्रममा वडा नम्बर ३ का अध्यक्ष वासुबहादुर बस्नेत, विराटनगर प्रज्ञा प्रतिष्ठानका अध्यक्ष विवश पोखरेल, ज्येष्ठ नागरिक चन्द्रबहादुर बस्नेत, आयोजक संस्थाका सचिव दिनेशराज सुवेदी (दिङ्लाली कान्छो), रमेशकुमार चापागाईं, प्रतिमा निरौला, सुदीप अधिकारी, पुष्पलता कोइरालालगायतले बालागुरु षडानन्द अधिकारी र सम्मानित व्यक्तिहरूका विषयमा चर्चा गरेका थिए ।
