भानुको वक्तृत्वकला बस्नेत र कविता प्रतियोगितामा सुवेदी अब्बल
विराटनगर । विराटनगरको प्रतिष्ठित शैक्षिक संस्था भानु कलेजले आयोजना गरेको कविता प्रतियोगितामा रीया सुवेदीको कविता अब्बल सावित भएको छ ।
शुक्रबार कलेज परिसरमा आयोजित प्रतियोगितामा ‘नयाँ नेपालको आस, युवाहरूको लाश’ शीर्षक कविता वाचन प्रस्तुत गर्ने सुवेदी प्रथम हुन सफल भइन् । कवि एवं पत्रकार मीनकुमार नवोदित प्रमुख निर्णायक रहेको समितिले २० जना प्रतिस्पर्धीमध्येबाट सुवेदीको कवितालाई प्रथम घोषणा गरेको थियो । कलेजका शिक्षक वसन्त बस्नेतसमेत सहभागी निर्णायक समितिले गरिमा चौधरीको कवितालाई दोस्रो, अन्वेषा पोखरेलको कवितालाई तेस्रो र राकेश यादवको कवितालाई सान्त्वना घोषणा गरेको थियो ।
विद्यार्थीभित्र रहेको प्रतिभा प्रस्फुटन गराउने उद्देश्यले आयोजित प्रतियोगितामा प्रतिस्पर्धीहरुले राजनैतिक विकृति, विसंगति, भ्रष्टाचार, बेरोजगारी, महिला समस्या, जातीय विभेदलगायतका विषयमा केन्द्रित रहेर लेखेका कविता वाचन गरेका थिए ।
त्यस्तै शुक्रबार नै कलेजले वक्तृत्वकला प्रतियोगितासमेत आयोजना गरेको छ । ‘सामाजिक सञ्जाल र यसले युवामा पारेको प्रभाव’ विषयमा आफ्ना उत्कृष्ट विचार प्रस्तुत गरेर मान्यता बस्नेत प्रथम भइन् ।
त्यस्तै रविना खातुनले दोस्रो र सत्यम कर्णले तेस्रो स्थान प्राप्त गर्दा समा खातुनले सान्त्वना पुरस्कार जितिन् । वक्तृत्वकला प्रतियोगिताको पनि निर्णायकमा नवोदित र बस्नेत नै रहेका थिए ।
कार्यक्रमका प्रमुख अतिथिसमेत रहेका नवोदितले विद्यार्थीको प्रतिभा प्रस्फुटनका लागि कलेजले प्रदान गर्ने यस्ता मञ्च निकै उपलब्धिमूलक हुने बताए । उनले विद्यार्थीहरुलाई आफूभित्र रहेको प्रतिभा लुकाएर नबस्न आग्रहसमेत गरे । नवोदितले विद्यार्थीले पाठ्यपुस्तक अध्ययनसँगै अतिरिक्त क्रियाकलापमा पनि ध्यान दिनुपर्नेमा जोड दिए ।
कलेजका प्राचार्य मोहनकुमार श्रेष्ठको सभापतित्व सम्पन्न कार्यक्रममा निर्देशक तथा कार्यक्रम संयोजक देवेश प्रधान, निर्देशक रमेश पाण्डे, वसन्त बस्नेतलगायतले भानु कलेजले पठनपाठनसँगै अतिरिक्त क्रियाकलापलाई उच्च प्राथमिकतामा राखेको बताए । उनीहरुले कलेजले कविता, वक्तृत्व, हाजिरीजवाफ, वादविवादसहित खेलकुदका विभिन्न प्रतिस्पर्धा गर्ने सुनाए ।
