विराटनगर महानगरद्वारा खसी–बाख्रा र सुँगुर–बँगुरलाई निःशुल्क खोप
विराटनगर । विराटनगर महानगरपालिकाले पीपीआर÷स्वाइन फिभरविरुद्धको निःशुल्क खोप शुभारम्भ गरेको छ ।
महानगरको कृषि तथा पशुपन्छी विकास शाखाको आयोजनामा शुक्रबारदेखि खसी, बाख्रा र सुँगुर–बँगुरमा लाग्ने पीपीआर÷स्वाइन फिभर विरुद्धको निःशुल्क खोप शुभारम्भ गरिएको हो ।
विराटनगर–४ इक्राहीस्थित पूजा कृषि फर्मबाट खोप अभियान सुरु गरिएको शाखाका संयोजक हिरालाल यादवले जानकारी दिए । आर्थिक विकास समितिका संयोजक श्याम घिमिरेको प्रमुख आतिथ्यता तथा वडा नम्बर ४ का अध्यक्ष जितन थापाको अध्यक्षतामा खोप अभियानको शुभारम्भ गरिएकाो थियो ।
महानगरभित्रका सबै वडामा कृषकले पालेका २४ हजार १ सय खसी–बाख्रालाई पीपीआर खोप लगाइनेछ । त्यस्तै सुँगुर–बँगुरलाई १ हजार १ सय डोज खोप लगाइने शाखाका संयोजक यादवले जानकारी दिए ।
महानगरका सबै वडामा खोप अभियान सञ्चालन गरिनेछ । खोप लगाइसकेपछि पीपीआर÷स्वाइन फिभरबाट हुने मृत्युको जोखिम कम हुने यादवले बताए ।
