कोशीमा बिशेषज्ञ सेवा सहितको घुम्ती अस्पताल आजबाट संचालनमा
विराटनगर । कोशी प्रदेश सरकारद्वारा नेपाल मै पहिलो बिशेषज्ञ सेवा सहितको घुम्ती अस्पताल आजबाट संचालनमा आएको छ।
कोशी प्रदेशका मुख्यमन्त्री हिक्मतकुमार कार्कीले आज झापाको कमल गाउँपालिकाबाट घुम्ती अस्पतालको शुभारम्भ गरेका हुन् ।
ठूलो बसभित्र अत्याधुनिक मेडिकल उपकरण जडान गरी यो सेवा सञ्चालनमा ल्याइएको हो । कोशी प्रदेश स्वास्थ्य निर्देशनालयका नर्सिङ प्रशासक आस्था थापाका अनुसार बसभित्र रेडियोलोजी, मुटुको एक्सरे, ब्लड टेस्ट, रगतको नमुना सङ्कलन गरी परीक्षण गर्ने उपकरण जडान गरिएको छ ।
घुम्ती अस्पताल नेपालमै पहिलो र नमुनायोग्य भएको चर्चा गर्दै यसलाई थप परिष्कृत गर्दै आम जनतामा पुर्याउने प्रदेश सरकारको तयारी रहेको मुख्यमन्त्री कार्कीको भनाइ थियो ।
