धनकुटामा ६६ वर्षको उमेरमा राईले गरे एसईई उत्तीर्ण
धनकुटा । धनकुटाका ६६ वर्षीय करवीर राईले माध्यमिक शिक्षा परीक्षा (एसईई) उत्तीर्ण गरेका छन्।
धरानस्थित सगरमाथा डल्फिन कलेजबाट परीक्षा आवेदन फारम भरेर सहभागी भएका राईले वृद्धावस्थामा एसईई पास गर्दै शिक्षा हासिल गर्न उमेरले कहिल्यै बाधा नपार्ने सन्देश दिएका छन्।
नाति–नातिनीको उमेर समूहका विद्यार्थीसँगै परीक्षा दिएका उनले यसअघि २०४० सालमा एसएलसी परीक्षा दिएका थिए। तर तीन विषयमा अनुत्तीर्ण भएपछि उनको पढाइ बीचमै रोकिएको थियो।
पारिवारिक परिस्थितिका कारण लामो समय पढाइलाई निरन्तरता दिन नसकेका राईले अहिले फुर्सदको समय सदुपयोग गर्दै पुनः अध्ययन सुरु गरेका हुन्। उनले भने, “पहिले पारिवारिक अवस्थाले पढ्न पाइएन। अहिले बुढेसकालमा काम पनि छैन, फुर्सद छ। पढौँ न त भनेर फेरि पढ्न थालेको हुँ।”
२०४९ सालमा तत्कालीन मुगा गाविसको उपाध्यक्षसमेत रहेका राई अब धनकुटा बजारमा प्लसटु अध्ययन गर्ने तयारीमा छन्।
