झलनाथलाई माधव नेपालको जवाफ, ‘भावनाको कुराले एकता हुदैँन’
काठमाडौं, १४ असार । नेपाली कम्युनिष्ट पार्टीकाका सहसंयोजक माधव नेपालले भावनाको कुरा गरेर मात्रै कम्युनिस्ट पार्टीहरू बिचमा एकता हुन नसक्ने बताएका छन् ।
एमालेका संस्थापक महासचिव मदन भण्डारीको ७५ औँ जन्मजयन्तीको अवसरमा आयोजित कार्यक्रमलाई सम्बोधन गर्दै कम्युनिस्ट आन्दोलनभित्र देखिएको समस्याको गम्भीर आत्मसमीक्षा गरेर मात्रै पार्टी एकतामा जानु पर्ने उनको जोड थियो ।
‘हामीले विगतको विसङ्गतिको आत्मसमीक्षा गर्नुपर्छ, यो एउटा पार्टीको निम्ति मात्रै होइन, नेपालका जति पनि कम्युनिस्ट घटकहरू छन्, ती सबैले आ(आफ्नो पार्टीभित्र आत्ममन्थन गर्नुपर्छ, आत्मचिन्तन गर्नुपर्छ । त्यो आत्ममन्थन गरेर सही निष्कर्षमा पुग्न सक्यौँ भने बल्ल कम्युनिस्टहरूलाई एक ठाउँमा ल्याउन सकिन्छ, नभए भावनाको कुरा गरेर मात्र हुँदैन्,’ नेपालले भने ।
उनले आजभोलि नै कम्युनिस्ट पार्टीहरू मिल्ने सम्भावना नदेखेको बताउँदै अर्का नेता झलनाथ खनालको कम्युनिष्ट पार्टीहरू बिच तत्काल एकता गर्नुपर्ने प्रस्तावलाई सोही मञ्चवाट अस्विकार गरिदिएका हुन् ।
